नाइजेरियाको उत्तरपूर्वी क्षेत्रमा एक दशकअघि आतंकवादी संगठन बोको हरामले आक्रमण शुरु गरेयता हालसम्म करिब २२ हजार नाइजेरियाली नागरिक बेपत्ता भएका छन् ।

अन्तर्राष्ट्रिय रेडक्रस (आईसीआरसी)ले बिहीबार सार्वजनिक गरेको प्रतिवेदनमा आईसीआरसीको रेकर्डमा यति ठूलो संख्यामा बेपत्ता नागरिकको सूची सार्वजनिक भएको यो पहिलो रहेको जनाइएको छ । आईसीआरसीका अध्यक्ष पिटर माउरर हाल पाँचदिवसीय भ्रमणका सिलसिलामा नाइजेरियामा छन् ।

बेपत्ता भएकामा झन्डै ६० प्रतिशत बालबालिका रहेका छन् । माउररले हजारौँ अभिभावक आफ्ना बेपत्ता बालबालिका अझै पनि घर फर्किने प्रतीक्षामा रहेको बताए ।

उनले भने, ‘हरेक अभिभावकको सपना आफ्ना बालबच्चा भेटिऊन् नै भन्ने हो । यो हजारौँ नाइजेरियाली बाबुआमाको दुःखद यथार्थ हो, र उनीहरू निरन्तर आफ्ना बालबच्चाको खोजीमा देखिन्छन् ।’

उनले आफ्ना प्रिय आफन्तबारे थाहा पाउनु जनताको थाहा पाउने अधिकार हो भन्दै पारिवारिक विछोड हुन नदिन सबै पक्षले विशेष ध्यान दिनुपर्ने बताए ।
माउररले नाइजेरियाका राष्ट्रपति मुहम्मद बुहारी, वरिष्ठ सरकारी अधिकारीहरू, नागरिक समाज र व्यावसायिक नेताहरूसँग पनि भेटघाट गरेका थिए । उनले माइदुरी र मोन्गुनोमा द्वन्द्वका कारण बेपत्ता भएका परिवारका सदस्यहरूसँग पनि कुराकानी गरे । यी दुवै स्थान बोको हरामको बलियो प्रभाव रहेको बोर्नो राज्यमा पर्दछ ।

आईसीआरसीले नाइजेरिया रेडक्रससँग मिलेर बेपत्ता व्यक्तिको खोजीका लागि फोटो र घरदैलो कार्यक्रम गरिरहेको छ । सन् २०१३ देखि हालसम्म आईसीआरसीले ३६७ जनाको समस्या सुल्झाएको छ ।

नाइजेरियाको उत्तरपश्चिमी ठूलो क्षेत्रमा सशस्त्र हिंसाको अवस्था छ, र त्यहाँ कुनै पनि मानवीय संस्थालाई काम गर्न सहज छैन । सरकारी फौज र विद्रोहीबीच भइरहने झडपका कारण यहाँबाट धेरै मानिस अन्यत्र पलायन वा विस्थापित भएका छन् ।

आईसीआरसीका अनुसार यहाँ स्वास्थ्यकर्मीमाथि पनि आक्रमण हुने गरेको छ । एक वर्ष पहिले पनि दुईजना मानवीय सहायताकर्मीलाई विद्रोही बोको हरामले हत्या गरेका थिए । सन् २००९ देखि नाइजेरियामा बोको हरामले सशस्त्र हिंसात्मक आन्दोलन जारी राखेको छ जसका कारण २७ हजारको मृत्यु भइसकेको छ भने करिब २० लाख मानिस विस्थापित भएका छन् ।