१३औँ दक्षिण एसियाली खेलकुद प्रतियोगिता (साग)को कार्यसमितिले आज (१० मंसिर) विशेष सम्बोधन तथा शुभकामनाको कार्यक्रमको आयोजना गरे पनि प्रधानमन्त्रीको अनुपस्थितिका कारण कार्यक्रम आयोजन खल्लो हुन पुगेको छ । कार्यक्रममा राष्ट्रिय खेलकुद परिषदका संरक्षक तथा प्रधानमन्त्री केपी शर्मा ओलीबाट सम्बोधन तथा शुभकामना दिने कार्यक्रम रहेको थियो ।
कमलादिस्थित प्रज्ञा प्रतिष्ठानमा आयोजित उक्त कार्यक्रममा प्रधानमन्त्री ओलीले १३औँ सागमा सहभागी खेलाडीहरूलाई सम्बोधन र शुभकामना व्यक्त गर्ने कार्यक्रम रहेको थियो । त्यसपछि दशरथ रङ्गशाला पुगेर रंगशालाको निरिक्षण तथा शुभकामना दिने कार्यक्रम तय भएको थियो ।
एक्कासी प्रधानमन्त्री अस्वस्थ भएपछि उनी उक्त सम्बोधन तथा शुभकामना कार्यक्रममा उपस्थित हुन सकेनन् । प्रधानमन्त्री उपस्थित नभएपछि उपप्रधानमन्त्री ईश्वर पोखरेल आउने चर्चा चलेको थियो । तर, पोखरेल पनि नआएपछि युवा तथा खेलकुद मन्त्री जगतबहादुर सुनार (विश्वकर्मा)ले खेलाडीहरुलाई शुभकामना दिने औपचारिकता निर्वाह गरेका थिए ।
प्रतिक्रिया