नेपालमा बसेर चीनविरुद्ध अपराधमा संलग्न रहेका १२२ चिनियाँ नागरिकलाई अभद्र व्यवहारअन्तर्गत मुद्दामा जनही एक हजार जरिवानाको फैसला भएको छ । काठमाडौंका प्रमुख जिल्ला अधिकारी जनकराज दाहालको इजलासले आयतबार (२० पुस) उक्त फैसला सुनाएको हो ।

‘उनीहरुले कसुर स्वीकार गरे, अभियोजनको आधारमा एक हजार जरिवानाको फैसला सुनाइएको हो’ प्रजिअ दाहालको भनाई छ ।

कनुनअनुसार अभद्र व्यवहारमा अधिकतम १० हजारसम्म जरिवाना हुने प्रावधान छ । तोकिएको जरिवाना तिरेर छुटेका चिनियाँहरूलाई थप कारवाहीका लागि आइतबार नै अध्यागमन विभागमा बुझाइएको बताइएको छ ।

महानगरीय प्रहरी परिसर काठमाडौंका प्रहरी नायब उपरीक्षक होविन्द्र बोगटीका अनुसार पर्यटक भिसामा आएर उनीहरुले अवैध रुपमा सङ्गठित काम गरेकाले अध्यागमन विभागको जिम्मा लगाउने निर्णय भएको हो ।

प्रहरीले यही पुस ७ गते काठमाडौंको मनमैजु, महाराजगञ्ज र बुढानिलकण्ठ क्षेत्रबाट १२२ जना चिनियाँलाई पक्राउ गरेको थियो ।