युरोपेली सङ्घ (ईयू)बाट बेलायतको बहिर्गमनपछिको नयाँ बिहानीबारे छलफल गर्न शुक्रबार (३१ जनवरी) ब्रसेल्समा भेला भएका उच्च अधिकारीले ब्रेक्जिटपछि बेलायतले ईयूसँग निकट रहँदाको लाभ गुमाउने बताएका छन् ।

युरोपेली आयोगका अध्यक्ष उर्सुला भोन डेर लेयनले आफूहरूले संयुक्त अधिराज्य (बेलायत)सँग सकेसम्म राम्रो सम्बन्ध कायम होस् भन्ने चाहेको तर समूहको सदस्य रहँदाजस्तो कहिल्यै हुन नसक्ने तर्क गरे । ईयू परिषद्का अध्यक्ष चाल्र्स मिसेल र युरोपेली संसद्का सभामुख ड्याभिड सासोलीसँगै उभिएर उनले भने– ‘एकताका कारण ईयूले विश्वमा राजनीतिक सम्मान हासिल गरेको हो र विश्वको आर्थिक शक्तिकेन्द्र बनेको हो ।’

युरोप अनुभवले आफूहरूलाई ‘पूर्णरूपमा पृथकता’ मा शक्ति क्षीण हुने तर अद्वितीय एकतामा बल हुने कुरा सिकाएको उनको धारणा छ ।

‘पूर्ण पृथक’ भन्ने वाक्यांश बेलायतको विश्वव्यापी व्यापारिक साम्राज्य भएका समय १९ औँ शताब्दीको युरोपेली मुख्य भूमिको राजनीतिबाट टाढा रहने विदेश नीतिसँग सम्बन्धित रहेको छ । बेलायतले ग्रीनवीच समयअनुसार शुक्रबार राति ११ बजे युरोपेली सङ्घ छोड्ने छ । ब्रसेल्सको मध्यरात अर्थात् १२ बजे ईयूबाट बेलायत बहिर्गमन भए पनि आगामी ११ महिनाको सङ्क्रमणकालमा ईयू नियमको व्यापार, यात्रा र व्यवसायसम्बन्धी अधिकांश कानूनलाई पालना गर्नुपर्ने एएफपीले जनाएको छ ।

बहिर्गमन हुनुभन्दा करिब एक घण्टा पहिले प्रधानमन्त्री बोरिस जोसनले अर्को हप्ता बेलायतको भाबी व्यापार सम्झौताका लागि वार्ता प्राथमिकताहरू खुलासा गर्ने अपेक्षा गरिएको छ । ब्रसेल्सले पनि आगामी एक साताभित्र व्यापार सम्झौताका विषयमा सहमति गरिने भोन डर लेनले पनि बताए ।

‘सोमबार, हामी हाम्रो इतिहासमा नयाँ पृष्ठ खोल्नेछौँ, आयोगले वार्ताका लागि आफ्नो धारणा प्रस्तुत गर्नेछ’, सञ्चारकर्मीहरूसँग उनले बताए– ‘हामी संयुक्त अधिराज्यको साथ उत्तम साझेदारीको चाहना गर्छौँ तर यो स्पष्ट छ कि त्यहाँ सधैँ विचारमा भिन्नता रहनेछ । युरोपेली सङ्घको सदस्य हुनुलाई गाह्रो छ । सङ्घमा सामथ्र्य छ ।’