चीनले अमेरिकाबाट आयात हुने करिब ७५ अर्ब डलरबराबरका सामानमा कर कटौती गर्ने घोषणा गरेको छ । गत फेब्रुअरी १४ मा चीनले करिब १५० अर्ब डलरबराबरका अमेरिकी सामानमा कर वृद्धि गर्ने घोषणा गरेको थियो ।

चिनियाँ कर आयोगका अनुसार अमेरिकी प्रशासनले चिनियाँ वस्तुमा करवृद्धि गर्ने घोषणा गरेपछि त्यसको प्रतिशोधस्वरूप चीनले पनि गत वर्ष सेप्टेम्बरमा एक हजार ७ सयभन्दा बढी किसिमका अमेरिकी वस्तुमा करवृद्धि गर्ने योजना सार्वजनिक गरेको थियो । यी करहरू ५ र १० प्रतिशत थिए ।

दश प्रतिशत करको दायरमा मुख्य रूपमा ताजा सामुद्रिक खाना, कुखुरा र सोयाबिन रहेका थिए । आयोगले जारी गरेको विज्ञप्तिमा चीन–अमेरिका आर्थिक तथा व्यापारिक सम्बन्धलाई स्वस्थ र स्थिर राख्ने प्रयत्नस्वरूप कर कटौती गरिएको उल्लेख छ । कर कटौतीको यो प्रस्ताव आगामी फेब्रुअरी १४ देखि नै लागू हुने आयोगको भनाइ छ ।

अमेरिकी प्रशासनले पनि करिब १२० अर्ब अमेरिकी डलरबराबरका चिनियाँ सामानमा थप कर नलिने घोषणा गर्ने अपेक्षा गरिएको छ । तथापि विगतमा घोषणा गरिएका कतिपय करवृद्धिका प्रस्ताव यथावत् रहने दुवै पक्षले जनाएका छन् । अमेरिका र चीनले गत जनवरीमा व्यापार–युद्धलाई मत्थर बनाउन र समझदारी विकास गर्न आंशिक व्यापार सम्झौतामा हस्ताक्षर गरिसकेका छन् । सम्झौतामा आगामी दुई वर्षभित्र २ सय अर्ब अमेरिकी डलरभन्दा बढीका अतिरिक्त सामान चीनले आयात गर्ने उल्लेख छ ।

पहिलो चरणको आंशिक सम्झौताअनुसार, अमेरिकाले १२० अर्ब डलर मूल्यबराबरका चिनियाँ सामानमा लगाइने करलाई आधा कटौती गरी ७.५ प्रतिशत कायम गर्नेछ । गत डिसेम्बरमा अमेरिकी राष्ट्रपतिले चिनियाँ सामानमा १५ प्रतिशत करवृद्धि गर्ने घोषणा गरेका थिए । अमेरिकी राष्ट्रपति डोनाल्ड ट्रम्पले पछिल्लो समय चीनसँगको सम्बन्ध निकै प्रगाढ रहेको र निरन्तर सुधारतर्फ अग्रसर भएको बताउँदै आएका छन् ।
रासस–एएफपी