कोरोना भाइरसको संक्रमणबाट चीनभरि मृत्यु हुने व्यक्तिको संख्या दुई हजार दुई सय नाघेको समाचार आइरहँदा यता चिनियाँ स्वास्थ्य अधिकारीहरूले यहाँका कारागारमा पनि यसको संक्रमण देखिएको बताएका छ्न् । शुक्रबार चिनियाँ अधिकारीहरूले जनाएअनुसार चिनियाँ कारागारमा रहेका करिब चार सय सय व्यक्ति कोरोना भाइरसबाट संक्र्रमित भएको पाइएको हो ।
यस प्राणघातक रोगको संक्रमण रोक्ने प्रयास चिनियाँ अधिकारीहरूले खोजिरहेका बेला थुनामा रहेका व्यक्तिमा समेत यस्तो अवस्था पाइएको खबरले यस महामारीको विषयमा चिनियाँ अधिकारीहरूले चिन्ता व्यक्त गरेका छन् । चीनको पूर्वी भागमा रहेको शाङ्डोङ प्रान्तमा रहेको रेन्चेङ कारागारमा सातजना सुरक्षागार्ड र दुई सय कैदीमा कोरोना भाइरसको संक्रमण देखिएको प्रान्तीय स्वास्थ्य आयोगले शुक्रबार पत्रकार सम्मेलन गरेर जानकारी दिएको बताइएको छ ।
कारागार प्रशासनका निर्देशक वु लेईले शुक्रबार सार्वजनिक भएको यो नयाँ घटनाले रोकथाम र नियन्त्रणका उपायको कार्यान्वयन प्रभावकारी रूपमा अघि बढ्न नसकेको देखिएको बताए । यस्तै चीनको पूर्वी प्रान्त झेजिङको सिलिफेन जेलमा पनि ३४ जनामा सो भाइरसको संक्रमण देखिएपछि सो कारगाराका निर्देशकले जानकारी दिएका छन् ।
गत वर्ष अन्त्यमा भाइरस देखापरेको मध्य प्रान्त हुबेईको कारागारले बिहीबार २ सय ७१ कोरोना भाइरसको थप संक्रमण देखिएको बताएको छ । हुबेई प्रान्तमा बिहीबार ४११ व्यक्तिमा कोरोना भाइरसका नयाँ संक्रमित देखिएको पुष्टि भएको थियो । तर, केही समयपछि कारागारमा देखिएको संख्यासहित ६३१ जनामा सो भाइरसको संक्रमण देखिएको जानकारी दिइएको छ ।
यस प्राणघातक भाइरसका कारण चीनको जनजीवन झनभन्दा झन प्रभावित हुँदै गएको बताइएको छ । यहाँका विद्यालय बन्द छन् भने बाहिर कतैबाट बेइजिङ पुगेका चिनियाँ नागरिकलाई पनि कम्तीमा पनि १४ दिन क्वारेन्टाइनमा बस्न भनेको छ ।
त्यसैगरी बिहीबार नयाँ ठाउँका दुई नयाँ अस्पतालमा यस संक्रमणका बिरामी देखिएपछि बेइजिङले पनि थप सतर्कता अपनाउनुपर्ने भनेको छ । बेइजिङका फक्सिङ अस्पतालमा ३६ जना बिरामी भेटिएका छन् भने त्यहाँ उपचारमा कार्यरत केही स्वास्थ्यकर्मी पनि बिरामी परेका छन् । ती स्वास्थ्यकर्मीका परिवारका सदस्यमा पनि यसको संक्रमण देखिएको बताइएको छ ।
रासस–एएफपी
प्रतिक्रिया