चीनमा थप ४२ जनाको ज्यान गएपछि कोरोना भाइरस संक्रमणका कारण विश्वभरि मृत्यु हुने मानिसको संख्या तीन हजार नाघेको सोमबार जनाइएको छ ।

चीनमा मात्र यस भाइरसका कारण दुई हजार २ हजार नौ सय १२ को मृत्यु भएको त्यहाँको राष्ट्रिय स्वास्थ्य विभागले जानकारी दिएको छ । हाल चीनमा यस रोगबाट ज्यान गुमाउने सबै व्यक्ति हुबेई प्रान्तका रहेको पनि समाचारमा जनाइएको छ । यस भाइरसका कारण मृत्यु हुनेमध्ये ९० प्रतिशतभन्दा बढी मानिस चीनको हुबेई प्रान्तका रहेका छन् ।

गत डिसेम्बरको अन्त्यबाट चीनको हुबेई प्रान्तको वुहान शहरबाट फैलिएको यस भाइरसको संक्रमण हाल ६० भन्दा बढी देशमा फैलिएको छ । चीनबाहेक विश्वका अन्य १० देशका मानिसको कोरोना भाइरस संक्रमणको कारण मृत्यु भएको छ । इरानमा हालसम्म ५४ जनाको मृत्यु भएको पुष्टि भएको छ । इटलीमा पनि ३० जनाभन्दा बढी मानिसको ज्यान गइसकेको छ ।

यस भाइरसका कारण विश्वभर कम्तीमा ८९ हजार जनामा संक्रमण भएको पुष्टि भएको छ । इटलीमा ४८ घन्टामा संक्रमित मानिसको दर दोब्बर भएको त्यहाँको स्वास्थ्यसम्बन्धी निकायले जनाएको छ । त्यहाँ कम्तीमा ३४ जनाको मृत्यु तथा करिब १७ सय जनामा संक्रमण भएको पुष्टि भएको छ । बेलायतमा ३६ जनामा संक्रमण भएको पुष्टि भएपछि प्रधानमन्त्री बोरिस जोनसनले सोमवार आपतकालीन बैठक बोलाएका छन् ।

चीनपछि सर्वाधिक संक्रमण देखिएको दक्षिण कोरियामा थप पाँच सयजना संक्रमित भेटिएका छन् । त्यहाँ चार हजार दुई सय १२ मा संक्रमण भएको सरकारी तथ्यांक रहेको समाचारमा जनाइएको छ ।
रासस–एएफपी