अमेरिकाको मध्यपूर्वी राज्य टेनिसीमा आएको आँधीमा परी दुई दर्जनभन्दा बढि मानिसको ज्यान गएको छ । स्थानीय समय अनुसार मङ्गलबार बिहान आएको आँधीका कारण शुरुमा आठ व्यक्तिको मृत्यु भएको बताइए पनि मृतकको संख्या बढेर पच्चीस पुगेको छ भने धेरै भौतिक संरचनाहरूमा क्षति पुगेको अमेरिकी अधिकारीले बताएका छन् । आँधीले उक्त राज्यको राजधानी न्यासभिलमा समेत व्यापक संरचनाहरूमा क्षति पुऱ्याएको बताइएको छ ।

टेनिसीको विपद् व्यवस्थापन निकायका मेलिसा हक्सले आँधीले पुऱ्याएको क्षतिबारे जानकारी दिँदै राज्यका चार ‘काउन्टी’मा व्यापक भौतिक संरचनामा क्षति पुगेको बताएका एएफपीले जनाएको छ ।

न्यासभिलको अग्नि नियन्त्रण विभागले आँधीका कारण राजधानीका विभिन्न ४० स्थानका भौतिक संरचनामा क्षति पुऱ्याएको र अझै पनि धेरै मानिस सम्पर्कबाहिर रहेको उल्लेख गरेको छ ।

नाशभिलबाट ८० माइल पूर्वमा रहेको पट्नम काउन्टीमा सबैभन्दा बढी क्षति भएको र त्यहाँ डेढ दर्जन मानिसले ज्यान गुमाएका छन् । हजारौँ मानिस विद्यूत् विना रहन बाध्य भएका छन् भने राष्ट्रपति डोनाल्ड ट्रम्पले टेनिसीको भ्रमण गर्ने तयारी गरेका बताइएको छ ।