क्वारेन्टाइनबाट निकालिएका १५० भन्दा बढी नेपाली मजदुरको व्यवस्थापन गर्न दबाबस्वरुप भारतको उत्तराखण्ड प्रदेश कंग्रेस आइका महासचिव भुवन कापरी खटिमामा धर्नामा बसेका छन् ।
उत्तराखण्डको काशीपुर र रुद्रपुरमा १४ दिन क्वारेन्टाइन राखिएपछि क्वारेन्टाइन बसेको पत्र हातमा थमाउँदै नेपालीलाई त्यहाँबाट लखेटिएको थियो । सो घटनाप्रति आपत्ति जनाउँदै उनले उत्तराखण्ड सरकारसँग उचित व्यवस्थापनको माग गर्दै साङ्केतिक धर्ना दिएका हुन् ।
करिब सय किलोमिटर पैदल हिँडेर भारतीय बजार खटिमा पुगेका १५० भन्दा बढी नेपालीले कंग्रेस प्रदेश महासचिव कापरीले भोजनको व्यवस्थापनसमेत गरेका बताइएको छ ।
खटिमाको सञ्जयपार्क शहीद स्मृतिमा धर्नामा बसेका कापरीले ‘लखेटिएका नेपालीलाई पुनः त्यही क्वारेन्टाइनमा राख्नुपर्ने, क्वारेन्टाइन नबसेकालाई खटिमामै क्वारेन्टाइनमा राख्नुपर्ने र नेपाल सरकारले पनि आफ्ना नागरिक लैजान पहल गरोस् भनेर धर्नामा दिइएको’ प्रतिक्रिया दिएका छन् ।
प्रवासी नेपालीको समस्याप्रति गम्भीर सरोकार राख्दै उनले आफ्नो फेसबुक वालमा लेखेका छन्– ‘अतिथि देवता समान हुन् भन्ने हाम्रो संस्कृति रहिआएको छ । सरकारसँग म प्रश्न गर्छु कि के यो परम्परा हामीले भुल्यौँ ? आज नेपाली प्रवासीहरू, जो हाम्रा दाजुभाइ हुन्, उनीहरूमाथि यस्तो अमानवीय व्यवहार किन गरिँदै छ ? सरकारसमक्ष मेरो निवेदन छ कि जबसम्म भारत–नेपाल सीमानाका खोलिँदैन तबसम्म उनीहरूलाई राहत शिविरमा राखियोस्, ता कि उनीहरूले कुनै प्रकारको समस्या झेल्नु नपरोस् ।’
प्राप्त जानकारीअनुसार अलपत्र नेपाली खटिमाको बसपार्क, सडक छेउछाउमा आश्रय लिइरहेको छन् । उनीहरू कञ्चनपुर, जाजरकोट, कालिकोट, डडेल्धुरा, कैलाली र बैतडीका स्थानीयवासी रहेको बुझिएको छ । कञ्चनपुरका सहायक प्रमुख जिल्ला अधिकारी गोकर्णप्रसाद उपाध्यायलाई उद्धृत गर्दै राससले जनाएअनुसार सीमावर्ती भारतीय बजारमा नेपाली अन्यत्रबाट आइरहेका छन् । ‘हाम्रो अफिसियल तथ्याङ्कअनुसार सीमावर्ती भारतीय बजार बनबासा र टनकपुर क्वारेन्टाइनमा २५१ नेपाली छन्, नेपाल ल्याउने विषयमा केन्द्रबाट केही निर्देशन आएको छैन’– प्रजिअ उपाध्यायको भनाई छ ।
प्रतिक्रिया