मध्य अमेरिकी राष्ट्र मेक्सिकोको पुब्ला राज्यमा मिसावटयुक्त विषालु मदिरा सेवन गरी कम्तीमा ४२ जनाको मृत्यु भएको एजेन्सीहरुले जनाएका छन् । एक दाहसंस्कार कार्यक्रममा दिइएको मदिरा सेवन गरेकामध्ये बयालिस जनाको ज्यान गएको र अन्य केही गम्भीर बिरामी अवस्थामा रहेका बताइएको छ ।

एएफपीले जनाएअनुसार राजधानी मेक्सिको सिटीबाट करिब २०० किलोमिटर उत्तरपूर्वको गाउँमा भएको यस घटनामा अरु ११ जना जीवनमरणको दोसाँधमा रहेका छन् । उनीहरुको स्थानीय अस्पतालमा उपचार भइरहेको छ स्थानीय सरकारले जनाएको छ ।

मदिरा सेवन गरेपछि ती मानिसहरु वान्ता गर्ने र टाउको दुख्ने समस्याबाट ग्रसित भएका थिए । कोरोना भाइरस महामारीका कारण त्यहाँको बजारमा बियर र तथा अन्य प्रशोधित मदिरा पाइन छाडेको छ । त्यही कारण मानिसहरुले मिसावटयुक्त मदिरा सेवन गरेको स्थानीय अधिकारीहरुले बताएका छन् ।

गत महिना पनि अखाद्य मदिरा सेवन गरेका कारण पश्चिमी जालिस्को प्रान्तमा २१ जनाको मृत्यु भएको थियो ।