विकास रौनियार, धादिङ
इलाका प्रहरी कार्यालय गजुरी (धादिङ) द्वारा सादा पोसाकमा खटिएको प्रहरी टोलीले चोरीको मोटरसाइकलसहित दुई जनालाई पक्राउ गरेको छ । प्राप्त विशेष सूचनाका आधारमा गजुरी गाउँपालिका वडा नं. ४ बस्ने आशोक तामाङ र बेनिघाट रोराङ गाउँपालिका वडा नं. १ बालुवा भन्ज्याङ बस्ने सुवास तामाङ पक्राउ परेका हुन् ।
काठमाडौंबाट चोरी गरी ल्याएको बा ६१ प ९५१० नं. को २२० सिसिको पल्सर मोटरसाइकलको नम्बर प्लेट परिवर्तन गरी बा ६१ प ९५१० नं. को नम्बर प्लेट लगाई बिक्री गर्ने उद्देश्यले गजुरी चालिसेतर्फ ल्याउँदै गर्दा प्रहरीले उनीहरुलाई नियन्त्रणमा लिएको हो ।
इलाका प्रहरी कार्यालय गजुरी धादिङका सुचना अधिकारी प्रहरी निरीक्षक भोजराज पाण्डेका अनुसार सादा पोसाकमा खटिएको प्रहरी टोलीले गजुरी गाउँपालिका वडा नं. २ चालिसेबाट वाल्चिङ सुन्दरनागीतर्फ जाने कच्ची बाटोमा २ जनालाई चोरीको मोटरसाइकलसहित नियन्त्रणमा लिएको हो । चोरीमा संलग्न व्यक्तिहरुलाई मोटरसाइकलसहित आवश्यक कार्वाहीको लागि महानगरीय प्रहरी वृत्त नयाँ बानेश्वर, काठमाडौं पठाइएको प्रहरी निरीक्षक पाण्डेले जानकारी दिए ।
प्रतिक्रिया