पछिल्लो २४ घण्टामा नेपालमा थप ३,५५६ जना कोरोना संक्रमित थपिएका छन् । यससँगै नेपालमा कोरोना संक्रमितको संख्या १,१५,३५८ पुगेको छ ।

काठमाडौं उपत्यकामा मात्र आज (२७ असोज) थप २,१२९ जनामा कोरोना भाइरसको संक्रमण पुष्टि भएको छ । स्वास्थ्यमन्त्रालयका अनुसार काठमाडौंका १,७४६, भक्तपुरका १६७ र ललितपुरका २१६ जनामा संक्रमण पुष्टि भएको हो ।

मन्त्रालयका अनुसार पछिल्लो २४ घण्टामा देशभर ३,५५६ जना कोरोना संक्रमित थपिएका छन् । यससँगै नेपालमा कोरोनासंक्रमितको कुल संख्या १,१५३५८ पुगेको छ । स्वास्थ्य तथा जनसंख्या मन्त्रालयका अनुसार मंगलबार १,५०३ जना कोरोना संक्रमित डिस्चार्ज भएका र हालसम्म डिस्चार्ज हुनेको संख्या ७८,७८० पुगेको छ ।

यस्तै, स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले कोरोना भाइरसको संक्रमण दिनप्रतिदिन बढ्दै गएपछि अस्पतालहरुमा स्वास्थ्य अवस्था गम्भीर भएका संक्रमितहरुको संख्या पनि बढ्न थालेको जानकारी दिए ।

पछिल्लो समय आईसीयु र भेन्टिलेटरको अभावमा ज्यान गुमाउने संक्रमितको संख्या पनि बढ्दै गएको छ । हालसम्म देशभर कोरोनाबाट ६६३ जनाको मृत्यु भइसकेको छ । पछिल्लो २४ घण्टामा मात्रै थप १८ जना कोरोना संक्रमितले ज्यान गुमाएका छन् । संक्रमितको संख्या बढ्दै जाँदा काठमाडौं उपत्यकामा अस्पतालको स्रोत साधनले धान्न नसक्ने अवस्था आइसकेको स्वास्थ्य मन्त्रालयले सूचना दिएको छ ।