राजाका नाममा राजनीति गर्नेहरूको बिल्लीबाठ
देशका विभिन्न ठूला शहरहरूमा राजतन्त्र पुनर्स्थापनाको माग गर्दै भब्य मोटरसाइकल र्याली हुन थालेपछि राजाका नाममा राजनीति गर्दै आएको राप्रपाका नेताहरूमा छटपटी बढेको पाइएको छ । वीर गोर्खाली अभियानको नाममा हुने गरेको र्याली कसको नेतृत्व र लगानीमा भइरहेको हो भन्ने जानकारी पाउन न प्रशासनले सकेको छ न राजाका निकटवर्तीहरू तथा राजाबाट विगतमा लाभ प्राप्त गर्दै आएकाहरूले नै यसको भेउ पाउन सकेका छन् । तर भब्य र्यालीको क्रेडिट (जश) लिने होडबाजी भने श्रीषशमशेर राणादेखि वर्तमान सङ्घीय, गणतान्त्रिक, जातिवादी तथा धर्मनिरपेक्ष संविधानलाई विश्वकै उत्कृष्ट दाबी गर्ने तत्कालिक परराष्ट्रमन्त्री कमल थापासम्मले प्रयास गरिरहेका छन् । मोटरसाइकल र्यालीहरूमा मानिसको सहभागिता बढ्न थालेपछि संस्थापन पक्ष सचेत भएको छ र गृहमन्त्रालयले कडा निगरानी राख्न प्रहरी प्रशासनलाई निर्देशन दिएको छ ।
गत कात्तिक १७ गते बुटवलमा आयोजित र्यालीमा मानिसहरूको ब्यापक सहभागिता भएपछि देशैभरि त्यसको तरङ्ग पैदा भएको छ । त्यसपछि कात्तिक २२ गते वीरगञ्ज, २७ गते विराटनगर, मङ्सिर १० गते पोखरा र १४ गते हेटौँडा तथा नेपालगञ्जमा आयोजित र्यालीमा पनि मानिसहरूको ब्यापक सहभागिता थियो । वीर गोर्खाली अभियानका नाममा भइरहेका कार्यक्रमहरूमा पछिल्लो समय शिव सेना, शाही शक्ति आदि नामका समूहले पनि आफ्नो उपस्थिति जनाउने गरेको पाइएको छ । तर यी कार्यक्रमहरूमा एटीएफ नेपाल नामक सङ्गठनको प्रमुख र नेतृत्वदायी भूमिका रहेको छ, जसको संयोजक सन्तोष राजावादी (सिलवाल) रहेका छन् ।
धादिङ घर भएका सन्तोष एक अविवाहित युवा राजनीतिकर्मी हुन् र उनले राजालाई सिंहासनमा राखेर श्रीपेच पहिर्याएपछि मात्र विवाह गरेर घरजम गरिबस्ने अठोट गरेको बताइन्छ । सन्तोष कुनै पनि दलमा आवद्ध छैनन् र अहिलेसम्म राजासँग समेत कुनै सम्पर्क/सम्बन्ध नरहेको बुझिएको छ । आयोजित कार्यक्रमहरूमा हुने गरेको उत्साहजनक सहभागितालाई निरन्तरता दिन मङ्सिर १८ गते दाङ र सुर्खेत, २२ गते बारा, २६ गते तनहुँ, २३ गते गौर तथा २० गते झापा र चितवनमा वृहत र्याली गरिने भएको छ ।
र्यालीको मूख्य आयोजक संस्था वीर गोर्खाली अभियान राजसंस्था पुनर्स्थापना भएलगत्तै भङ्ग गरिने, तर एटीएफ (एनि टाइम फोर्स) लाई चाहिँ त्यसपछि पनि निरन्तरता दिइने बताइएको छ ।
वीर गोर्खाली अभियानको सक्रियतापश्चात सबैभन्दा ठूलो सङ्कट राप्रपामा देखापरेको छ । अभियानले राप्रपासँग कुनै साइनो र सरोकार नराखेको मात्र होइन, कमल थापा र राप्रपालाई पूर्ण अवज्ञा नै गर्ने गरेको छ । तथापि झापामा हुने कार्यक्रममा राजेन्द्र लिङ्देनको सक्रियतालाई भने अभियानले स्वागत गरेको बुझिन्छ । लिङ्देनलाई एक इमानदार, सिद्धान्तनिष्ठ जनप्रतिनिधि भएकोले अभियानले उनको सक्रियतालाई स्वागत गरेको बताइएको छ । कार्यक्रममा पुराना राष्ट्रवादी नेता किशोरी महतोको सक्रिय सहभागितालाई पनि सम्बद्ध पक्षले सकारात्मक रुपमा लिएको छ ।
विशाल र्यालीहरूको जश लिने र राजालाई ‘बहादुरी देखाउने’ प्रयासमा कमल थापा र श्रीषशमशेर राणासहित केही व्यक्तिहरू लागेका भए पनि उनीहरूलाई अहिलेसम्म सफलता मिलेको छैन । हिजो राजा बचाउन नसक्नेहरूबाट राजसंस्था पुनर्बहालीमा कुनै योगदान हुन नसक्ने ठहर सम्बद्ध आयोजक पक्षले गरेको छ ।
प्रतिक्रिया