हुम्लाको अदानचुली गाउँपालिका–१ का वडाध्यक्षमाथि हातपात हुँदा उनी सख्त घाइते बन्न पुगेका छन् । स्थानीय श्रीनगरको सडकका विषयमा छलफल हुने क्रममा विवाद चर्किएपछि वडाध्यक्ष रग थापामाथि हातपात भएको हो ।

सत्तारूढ नेपाल कम्युनिस्ट पार्टी (नेकपा)को अदानचुली गाउँपालिका–१ को वडा कमिटी बैठक एवम् कार्यक्रम अनुगमनमा सहभागी वडाध्यक्ष रग थापामाथि पार्टीकै नेता-कार्यकर्ताद्वारा हातपात भएको र सो क्रममा उनको टाउको, मुख र शरीरमा चोट लाग्नाका साथै गम्भीर घाइते भएको बताइएको छ ।

प्रधानमन्त्री स्वरोजगार कार्यक्रमअन्तर्गत अदानचुली गाउँपालिका–१को कार्यक्रम अनुगमनमा गएको समयमा वडाध्यक्ष थापामाथि ढुङ्गाले हानेर गम्भीर घाइते बनाइएको हो । बताइएअनुसार वडाध्यक्ष थापाले प्राविधिकको सर्भेविना श्रीनगरको सडक मनपरी ढङ्गले काट्न नहुने भन्दै तर्क गर्दा उनमाथि एक्कासी ढुङ्गामुढा भएको थियो । सो घटनामा परी वडाध्यक्ष थापासहित तीनजना घाइते भएका छन् ।

‘पार्टीको वडा कमिटीले वडाको सत्तासँग छलफल गर्ने भनेर चिठ्ठी काटेकाले म त्यहीअनुसार बैठकमा सहभागी भएँ, सबैले राखेका जिज्ञासाको जवाफ दिने क्रममा ‘तिमी सत्ताका भतुवाहरु भत्ताले मातेका’ भन्दै अचानक आएर मुखमा हिर्काएु, वडाध्यक्ष थापाको भनाइ छ ।

घाइते हुने वडाध्यक्ष थापा, स्थानीय दीपक थापा र मक्क थापा गरी तीनजनाको स्थानीय स्वास्थ्यचौकीमा उपचार भइरहेको छ । यसभन्दा अगाडि साउन २२ गते नेपाली कांग्रेस र नेपाल कम्युनिष्ट पार्टी (नेकपा)बीच पनि झडप भएको थियो ।