विकास रौनियार, धादिङ

पृथ्वीराजमार्ग अन्तर्गत धादिङको थाक्रे गाउँपालिका वडा नम्बर २ कोइरालेमा ट्रक जुध्दा दूई जनाको ज्यान गएको छ ।

मुग्लिङबाट काठमाडौं आउँदै गरेको लु २ ख २७० नम्बरको ट्रकले सोही दिशातर्फ बिग्रेर रोकिराखेको ना ६ ख ६४६५ नम्बरको ट्रकमा पछाडिबाट ठक्कर दिँदा दुर्घटना भएको हो ।

दुर्घटनामा परी मृत्यु हुनेमा ठक्कर दिने ट्रकका सहचालक संखुवासभा घर भएका किरण कार्की र ट्रकमा सवार बर्दियाका सानोसुकी वडा नं ९ का किरण प्रताप गुरुङ्ग रहेका छन् । उनीहरूको घटनास्थलमै मृत्यु भएको प्ररहीले जनाएको छ ।

नवलपरासीको सुनवाल नगरपालिका वडा नं ६ का चालक लिलाराम अधिकारी भने गम्भीर घाइते भएका छन् । साथै बाराको करैया गाउँपालिका वडा न ४ बस्ने कमल शाह पनि गम्भीर घाइते रहेका छन् । उनीहरूको उपचारका लागि काठमाडौं ट्रमा सेन्टर लगिएको इलाका प्रहरी कार्यालय गजुरीका प्रहरी निरीक्षक भोजराज पाण्डेले बताए ।

चालक निदाएर ट्रक ठक्कर खाएको हुन सक्ने प्रहरीको अनुमान रहे पनि थप जानकारी लिने कार्य भइरहेको बताइएको छ ।

गएराति ३ बजेर ३० मिनेटमा भएको दुर्घटनामा च्यापिएका चालकको २ घण्टा लगाएर मात्र प्रहरीले उद्वार गरेको निरीक्षक पाण्डेले बताए । मृतक दुवैको शव गजुरी प्राथमिक चौकीमा राखिएको बताइएको छ ।