यससँगै दाङमा ‘वर्ल्ड रेकर्ड’ राख्नेको संख्या दुई

सनत आचार्य

दाङका ऋषिश्वर परियारले विश्व कीर्तिमान (वर्ल्ड रेकर्ड) कायम गर्न सफल भएका छन् । परियारले Most Jumping Jacks in one Minute विधामा विश्व कीर्तिमान कायम गरेका हुन् । यससँगै दाङबाट विश्व कीर्तिमान राखिएको संख्या दुई पुगेको छ ।

तुलसीपुर उपमहानगरपालिका ३ रानागाउँ बस्ने २७ वर्षीय परियारले सन् २०२० को जनवरी महिनामा तुलसीपुरको अरनिको मैदानमा एक कार्यक्रम गरी एक मिनेटमा १२३ पटक पिटी जस्तै खेलिने दुवै हात-खुट्टा सँगै चलाउने अभ्यास गरेको भिडियो इमेलमार्फत गिनिज बुक अफ वर्ल्ड रेकर्डस्को कार्यालयमा पठाएका थिए । उक्त भिडियोको अवलोकन र अनुसन्धानपश्चात गिनिज वर्ल्ड रेकर्डस्को टिमले परियारलाई विश्व कीर्तिमानीको प्रमाण पत्र दिएको हो ।

परियारको नाममा यो रेकर्ड केही दिनअगाडि नै घोषिणा भए पनि त्यसको सूचना मंगलबार मात्रै आफूले पाएको उनले बताएका छन् ।

परियारले सुरुमा दूई हातले टेकेर हिँड्नेमा विश्व रेकर्डका लागि प्रयास गरे तापनि त्यसमा उनी असफल भए ।

त्यसपछि उनले अर्को नयाँ विधामा विश्व रेकर्ड राख्ने सोच बनाए । जसअनुसार उनी कुँद्ने र हातखुट्टा एकसाथ चलाउने (जम्पिङज्याक्स) विधामा विश्व कीर्तिमान राख्न सफल भए ।

परियारले विगत १३–१४ वर्ष पहिलेदेखि नै दुवै हातले टेकेर हिँड्ने प्रयासलाई निरन्तरता दिएका थिए । उनले पछिल्लो समयमा दुवै हातले टेकेर १ घण्टा १० मिनेटको समयमा साढे दुई किलोमिटरको दूरी पार गरेका थिए । यो परियारको नीजि अभ्यास थियो ।

यसअघि दाङकै स्वर्गीय चन्द्रबहादुर डाँगीले संसारका सबैभन्दा होचा व्यक्तिको रूपमा विश्व कीर्तिमान बनाएका थिए ।