सरकारले विभिन्न मितिमा जारी गरेका अध्यादेश सदनमा पेश गर्ने कि नगर्ने भन्ने विषय विवादमा भएपछि प्रतिनिधिसभाको पहिलो बैठक केही मिनेटका लागि अवरुद्ध भएको छ । सभामुख अग्निप्रसाद सापकोटाले सदनको आजको बैठकको कार्यसूचीमा रहेको अध्यादेश प्रस्तुत गर्ने विषय अघि बढाउनासाथ प्रचण्ड समूहले उठेर विरोध जनाएपछि सभामुखले भीम रावललाई बोल्न समय प्रदान गरे ।

सांसद् रावलले सदन प्रारम्भ भएको पहिलो बैठकमा सांसद र पूर्वसांसदले गणतन्त्र स्थापनाका लागि भएका आन्दोलनमा पुयाएको योगदानको सम्मान गर्दै सदनले शोक प्रस्ताव पारित गरी बैठक अन्त्य गर्नुपर्नेमा अध्यादेशलगायत अन्य कार्यसूची राखिएको भन्दै असहमति जनाएका थिए । कार्यसूची फिर्ता नलिए सदन बहिष्कार गर्ने घोषणा गर्दै उक्त समूहका नेताहरू बैठकबाट बाहिरिएका थिए ।

रावल बैठकमा बोलिरहँदा नेकपाकै अर्का सांसद खगराज अधिकारीले नियमापत्ति प्रकट गर्दै सदन चलेको पहिलो दिन नै अध्यादेश पेश गर्ने परम्परालाई ध्यान दिन सभामुखको ध्यानाकर्षण गराएका थिए । प्रचण्ड समूहका सांसद बाहिरिएसँगै प्रमुख प्रतिपक्ष दलका सचेतक पुष्पा भुसालले सर्वोच्च अदालतको संसद् पुनःस्थापना गर्ने निर्णयको आफ्नो पार्टीले स्वागत गरेको जानकारी दिँदै संसदभित्र देखिएका समस्या र चुनौतीलाई यहीँबाट टुङ्ग्याउनुपर्नेमा जोड दिइन् ।

“पहिलो दिनमै बैठक छोडेर जानुपर्ने अवस्था कसरी आयो, संवैधानिक परिषद् भनेको सरकार हो, सरकारले प्रस्तुत गरेको अध्यादेश स्वीकार गर्न सकिन्न”, उनको भनाइ थियो ।

प्रमुख सचेतक बालकृष्ण खाणले अध्यादेशलाई स्वीकार गर्न नसकिने भएकाले अविलम्ब फिर्ता गर्न माग गर्दै भने, ‘अध्यादेश स्वीकार गर्नै सकिन्न, यो सदनमा प्रवेश गर्न सक्दैन, अविलम्ब फिर्ता लिइयोस्, यदि यो फिर्ता लिइएन भने सदन अघि बढाउन सहयोग हुँदैन ।’

सचेतक खाणले उक्त भनाइ राखेपछि प्रतिपक्षका सांसदले नाराबाजी गर्दै रोष्टम घेराउ गरेका थिए । प्रतिपक्षले नारावाजी र रोष्टम घेराउ गरिरहँदा सभामुख सापकोटाले प्रधानमन्त्रीका तर्फबाट कानून न्याय तथा संसदीय मामिलामन्त्री लिलानाथ श्रेष्ठलाई संवैधानिक परिषद् (काम, कर्तव्य र अधिकारसम्बन्धी पहिलो संशोधन अध्यादेश), २०७७ बैठक समक्ष पेश गर्न अनुमति दिए । त्यसको लगत्तै प्रमुख प्रतिपक्ष दलले सदन बहिष्कार गर्दै बाहिर निस्केपछि सभामुख सापकोटाले १० मिनेटका लागि बैठक स्थगित गरिएको घोषणा गरेका थिए ।

प्रतिनिधिसभालाई सर्वोच्च अदालतको संवैधानिक इजलासले फागुन ११ गते पुनर्स्थापित गरेपछि आइतबार पहिलो पटक बैठक बसेको हो । आइतबार दिउँसो ४ बजेका लागि बोलाइएको बैठक ५ बजेपछि मात्र सुरु भएको थियो ।

पुनर्स्थापित संसदको पहिलो बैठक बुधबारसम्मका लागि स्थगित भएको छ । निर्धारित समयपछि सभामुखले बैठक सूचारु गराउन खोजे पनि विपक्षी दलहरु तयार नभएपछि सूचना टाँसेर बुधबार दिउँसो १ बजे सम्मका लागि बैठक स्थगित भएको जानकारी दिइएको हो ।