महाधिवेशन सरे कांग्रेस समाप्त हुन्छ

नेपाली कांग्रेसका नेता चन्द्र भण्डारीले तोकिएको मितिमा महाधिवेशन हुन नसके कांग्रेस समाप्त (कोल्याप्स) हुने चेतावनी दिएका छन् । चितवनमा सञ्चारकर्मीहरुसँगको कुराकानीमा कांग्रेसका प्रखर नेता भण्डारीले महाधिवेशन तोकिएकै मितिमा गर्नुपर्नेमा जोड दिए ।

महाधिवेशन अब सर्न नसक्ने भन्दै पार्टीलाई विधि र पद्धतिमा अगाडि लैजानुपर्ने धारणा उनले व्यक्त गरे । उनले भने- ‘नेपाली कांग्रेसले विधि छोडेको भन्ने विषयले चर्चा पाएको छ, पार्टी विधिअनुसार अगाडि बढ्नुपर्छ ।’

बेग्लै प्रसङ्गमा उनले अप्ठ्यारोमा परेका समयमा प्रतिपक्षले देशको नेतृत्व गर्नुपर्ने तर्क गरे ।

पार्टीभित्र कसलाई प्रधानमन्त्री बनाउने भन्ने महसुस हुन सक्ने तर देशलाई अप्ठ्यारो परेका बेलामा निकास दिनुपर्ने उनको भनाइ थियो । सर्वोच्च अदालतले आइतबार गरेको फैसलाको प्रसङ्गमा उनले अदालतले गरेको फैसला विधिको विजय भएको टिप्पणी गरे ।