सनिउल्ला धोबी, कपिलवस्तु
हालै सरकारद्वारा प्रतिबन्ध फुकाइएको नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले विगतमा सरकारले आफ्नो पार्टीमाथि प्रतिबन्ध लगाउनु गलत रहेको बताएका छन् । न्यायको पक्षमा लडाइँ गर्दा प्रतिबन्ध भोग्नु परेको उनले जिकिर गरे ।
कपिलवस्तुको शिवगढीमा सोमबार पार्टीनिकट अनेमसंघ क्रान्तिकारीको सातौँ राष्ट्रिय सम्मेलनलाई सम्बोधन गर्दै महासचिव विप्लवले समाजको अन्याय, अत्याचार र दमनका विरुद्ध लडेको आफ्नो पार्टीमाथि लगाएको प्रतिबन्ध र दमन सही नभएको तर्क गरे र प्रधानमन्त्री केपी शर्मा ओलीका साथै प्रचण्डको पनि आलोचना गरे ।
उनले भने, ‘बम टेक्दै र हतियार खोस्दै हिँड्न सकिन्छ तर न्यायको पक्षमा हामी कहिल्यै दब्नु हुँदैन । हामीले गल्ती गरेका छैनौँ ।’
महिलाले सम्पतिमा समान अधिकार नपाएसम्म मुक्ति नपाउने भन्दै विप्लवले न्यायको पक्षमा लाग्दा जनतामा जानै नदिन सरकारले आफूहरुलाई प्रतिबन्ध लगाएको दाबी गरे ।
‘गाउँगाउँमा भ्रष्टाचार गर्ने, बलात्कार गर्नेहरुलाई कारवाही गर्नु गल्ती हो ? भन्ने प्रश्न राख्दै विप्लवले भने, ‘लडाइँ भयो भने क्षति हुन्छ भन्ने हामीलाई राम्रोसँग थाहा छ । तर, दास भएर मर्नुभन्दा लडेर मर्नु धेरै ठुलो कुरा हो ।’ अन्यायका विरुद्ध प्रतिवाद गर्न आफू पछि नपर्ने संकेत महासचिव विप्लवले दिए ।
प्रचण्ड र बाबुरामहरूले न्याय र समानताको मुद्दा बिर्सेकाले उनीहरु धुलोपिठो भएको टिप्पणी गर्न विप्लव चुकेनन् । ‘आज प्रचण्डजी कहाँ पुग्नुभयो ? प्रचण्ड र बाबुरामले गलत बाटो लिए । सहिद परिवार, वेपत्ता, किसान मजदुर बिर्सिए । मन्त्री त हामी पनि हुन सक्थ्यौँ नि’, विप्लवको धथन थियो ।
सरकारले आफूहरुलाई प्रतिबन्ध लगाएको दुई महिनाभित्र सखाप पार्छौं भने पनि त्यो सत्य र न्यायका लागि लडेकाले नै सरकार असफल भएको तर्क उनले गरे ।
सो अवसरमा नेकपाका सचिवालय सदस्य धर्मेन्द्र बास्तोलाले जेलमा बसेको अनुभव सुनाउँदै देशमा बेरोजगारीको समस्याले अधिकांश युवाहरु लागुपदार्थ दुर्व्यसनको मुद्दामा जेलमा रहेको बताए ।
सरकारसँग तीन बुँदे सहमति भएको स्मरण गराउँदै उनले सरकारसँग सहमति भयो भन्दैमा आन्दोलन नसकिएको र आवश्यक परे देश र जनताको लागि बलिदान दिन तयार रहेको बताए । देश समृद्ध बनाउने आधारहरु आफूआवद्ध नेकपासँग रहेको उनको दाबी थियो ।
प्रतिक्रिया