सरकारको नेतृत्व गरिरहेको दल नेकपा एमालेका अध्यक्ष एवम् प्रधानमन्त्री केपी ओलीसँग सत्ता-साझेदारीको विषयमा छलफल चलाउँदै आएको जनता समाजवादी पार्टी (जसपा)ले संसदीय दलको नेता चयन गर्नेसहतिको एजेण्डामा बैठक शुरु गरेको छ ।
पार्टीको संसदीय दलको विधान पारित गर्ने, संसदीय दलको नेता चयनलगायत विषयबारे निर्णय गर्न जसपा संसदीय दलको बैठक सिंहदरबारमा शुक्रबार अपराह्न शुरु भएको हो । पार्टीको संसदीय दलको विधान पारित गर्नुका साथै बैठकले संसदीय दलको नेता चयन गर्ने जसपाका नेता लक्ष्मणलाल कर्णले जानकारी दिएका छन् ।
बताइएअनुसार सो दलका अध्यक्ष महन्थ ठाकुरलाई संसदीय दलको नेता चयन गर्ने तयारी गरिएको छ । दलको विधान पारित भएपछि संसदीय दलको नेता चयन गरिने छ भने समय भएमा सम्भवतः आजै नेता चयन हुनेछ । ठाकुरको नाम लगभग तय गरिएको भए पनि अहिले व्यक्तिको टुङ्गो नलागेको जसपा स्रोतले जनाएको छ ।
राजपा र समाजवादी पार्टी एकीकरण भएपछि बनेको जसपाले हालसम्म संसदीय दलको नेता चयन गर्न सकेको छैन । जसपामा ३४ सांसद रहेकामा दुई जना निलम्बित रहेकाले हाल ३२ मात्र सांसद् छन् ।
सत्ता साझेदारीका लागि निरन्तर परामर्शमा रहेको जसपाले बिहीबार प्रधानमन्त्री केपी शर्मा ओलीसँग छलफल गरेको थियो । प्रधानमन्त्री निवास बालुवाटारमा भएको उक्त छलफल सकारात्मक दिशामा केन्द्रित रहेको र आज थप छलफल हुने नेता कर्णले बताए ।
जसपाले कैदीबन्दीको रिहाइ, मुद्दा फिर्ता, संविधान संशोधनलगायतको माग राख्दै आएको छ । पार्टीले संसदीय दलको बैठकपछि आजै नेपाली कांग्रेसका सभापति शेरबहादुर देउवासँग पनि छलफल गर्दैछ ।
बूढानीलकण्ठस्थित देउवा निवासमा साँझ जसपाका शीर्ष नेताले भेटवार्ता गर्ने कार्यक्रम तय भएको जसपा नेता केशव झाले जानकारी दिएका छन् ।
प्रतिक्रिया