नौ जिल्लाले अझै पठाएनन् क्रियाशील सदस्यताको विवरण

नौ जिल्लाले कांग्रेस क्रियाशील सदस्यको विवरण पठाउन बाँकी रहेको कांग्रेस केन्द्रीय सदस्य एवं क्रियाशील सदस्यता छानबिन समितिका संयोजक रमेश लेखकले जानकारी दिएका छन् । यसबाट कांग्रेसको आगामी महाधिवेशनको निर्धारित कार्यतालिका प्रभावित हुन सक्ने देखिएको छ ।

पार्टी कार्यालयमा सोमबार सञ्चारकर्मीलाई जानकारी दिँदै नेता लेखकले बारा, सिराहा, सप्तरी, धनुषा, बाँके, बर्दिया, रुकुम पूर्व, डोल्पा र रसुवाबाट क्रियाशील सदस्यता वितरण तथा नवीकरणको विवरण प्राप्त हुन नसकेको बताए । हालसम्म झण्डै चार लाख क्रियाशील सदस्यता वितरण र नवीकरण भएको उनले जानकारी दिए ।

बताइएअनुसार हालसम्म दुई लाख १२ हजार ५१९ जनाको क्रियाशील सदस्यता नवीकरण भएको र एक लाख ८० हजार २७५ नयाँ क्रियाशील सदस्यता वितरण गरिएको छ ।

महाधिवेशन कार्यतालिकाअनुसार जिल्लाहरूले क्रियाशील सदस्यता वितरण तथा नवीकरणको सबै विवरण चैत १० भित्र सबै केन्द्रमा पठाइसक्नुपर्ने थियो । समयमै विवरण नपठाउने जिल्लाले कांग्रेसको आगामी १४औँ महाधिवेशनमा भाग लिन नपाउने प्रावधान छ ।

अहिले पार्टीमा झण्डै पाँच लाख क्रियाशील सदस्य रहेको र पार्टीको आगामी महाधिवेशनसम्म क्रियाशील सदस्यको सङ्ख्या १० लाख पुग्ने पनि नेता लेखकले दाबी गरे ।