युरोपेली संघ (इयु) ले अमेरिका र क्युवा सम्बन्ध सुधारका लागि मध्यस्थता गर्न सहमत भएको क्युवाली समाचार एजेन्सी एसीएनले बताएको छ ।

युरोपेली संघका उच्च प्रतिनिधि जोसेप बोरेलले बुधबार युरोपेली संसदमा क्युवाका जनतासँग मैत्री तथा एकता समूहको अनुरोधलाई स्वीकार गर्दै ‘आतंकवादलाई प्रोत्साहित गर्ने देशहरूको सूचीबाट क्युवालाई हटाउनका लागि अमेरिकी सरकारसामु मध्यस्थता गर्न’ ईयू तयार रहेको जानकारी गराएका हुन् ।

बोरेलले यूरोपेली संसदमा लेखेको पत्र, जसलाई बुधबार ट्वीटरमार्फत् सार्वजनिक गरियो, मा उच्च पदस्थ प्रतिनिधिले अमेरिकी नयाँ प्रशासनसँग हामीले अमेरिकाले क्युवालाई लगाउँदै आएको आतङ्कवादलाई प्रोत्साहन गरेको आरोपलाई हटाउनका लागि मध्यस्थ भूमिका खेल्न ईयू तयार रहेको बताइएको छ ।

प्रतिक्रियामा क्युवाको राष्ट्रिय जनशक्ति सभाका उपाध्यक्ष आना मारी माकाडोले सम्मेलन र सम्मेलनमा ईयूको भूमिकाप्रति प्रशंसा गरे ।

‘क्युवाले आतंकवादको प्रायोजन वा प्रवर्द्धन गर्दैन । हामी शान्ति, एकता र जनताबीचको सहयोगलाई समर्थन गर्दछौं,’ उहाँले भन्नुभयो ।

यसैबीच ईयूका लागि क्युवाका राजदूत कार्लोस मिगेल परेराले बिहीबार ट्विटरमा भनेका छन्, ‘क्युवालाई यस सूचीमा कहिले पनि सामेल नगरिएको हुनुपर्थ्यो । क्युवाले आतंकवादलाई होइन एकता र शान्ति प्रवर्द्धनमा विश्वास गर्छ ।’

युनिभर्सिटीका वरिष्ठ विश्वविद्यालयका प्रोफेसर र ईयूका लागि क्युवाका पूर्व राजदूत कार्लोस अल्जुगारायले भनेका छन्, ‘यूरोपेली संघले क्युवाप्रति आफ्नो रचनात्मक प्रतिबद्धता स्पष्ट रूपमा दर्शाएको छ ।’

उनले थपेका छन्, ‘यसको आर्थिक आयाम पनि छ । युरोपेली संघले क्युवामा आफ्नो आर्थिक गतिविधिलाई सुरक्षित गरेको छ । तर पूर्व अमेरिकी विदेशमन्त्री माइक पोम्पेको एकपक्षीय निर्णयका कारण यसमा समस्या देखिएको छ ।’

क्युवालाई पहिलो पटक संयुक्त राज्य अमेरिकाले सन् १९८२ मा आतंकवादलाई प्रायोजन गर्ने मुलुकका रूपमा घोषणा गरेको थियो भने तत्कालिन अमेरिकी राष्ट्रपति बाराक ओबामाको कार्यकालको अन्त्यतिर अर्थात् सन् २०१५ मा क्युवामाथिको उक्त आरोपलाई हटाई दुई देशबीच कूटनीतिक सम्बन्ध स्थापना गरिएको थियो ।