आजदेखि एमाले मुख्यालय विधिवत् रुपले थापाथलीमा

नेकपा (एमाले)को पार्टी मुख्यालय आजदेखि औपचारिक रुपमा थापाथालीबाट सञ्चालन भएको छ । प्रधानमन्त्री एवं नेकपा (एमाले)का अध्यक्ष केपी शर्मा ओलीले पार्टी केन्द्रीय कार्यालय भवनको आज उद्घाटन गरेपछि औपचारिक रुपमा सञ्चालन भएको हो ।

यसअघि यही वैशाख १ गते नै कार्यालय धूम्रबाराहीस्थित पासाङल्हामु स्मृति प्रतिष्ठानबाट थापाथलीमा सरेको थियो । आज बिहान साढे १० बजे प्रधानमन्त्री ओली पार्टी मुख्यालयमा पुगी आफ्नो कार्यकक्षमा बसेका एमाले कार्यालय सचिव ईश्वरी रिजालले जानकारी दिए ।

यस्तै, स्थायी कमिटी बैठक बस्ने कार्यकक्षमा पनि पार्टी अध्यक्ष ओली, महासचिव ईश्वर पोखरेल, अर्थमन्त्री विष्णुप्रसाद पौडेल, गृहमन्त्री रामबहादुर थापा, परराष्ट्रमन्त्री प्रदीपकुमार ज्ञवाली, लुम्बिनी प्रदेशका मुख्यमन्त्री शङ्कर पोखरेलसंँग केहीबेर बसेका थिए ।

तीन रोपनी क्षेत्रफलमा फैलिएको उक्त कार्यालयमा पार्टी अध्यक्ष, महासचिव, विदेश विभाग प्रमुख, सङ्गठन विभाग प्रमुखलगायतका कार्यकक्षसहित १२ कोठा छन् ।

प्रधानमन्त्री ओलीले गत चैत ११ गते पार्टीको नयाँ मुख्यालयको निरीक्षण गरेका थिए । चक्रपथ विस्तारका क्रममा कार्यालयमा आउजाउ गर्न कठिन हुने भएकाले एमालेपार्टी मुख्यालय थापाथलीमा सारिएको जनाइएको छ । विसं २०७२ को भूकम्पले बल्खु, मदननगरस्थित पार्टी मुख्यालय भत्किएपछि एमालेले धूम्रबाराहीस्थित प्रतिष्ठानको कार्यालय भाडामा लिई सञ्चालन गरेको थियो ।

यसैक्रममा नेपाल कम्युनिस्ट पार्टी स्थापना दिवसको अवसर पारेर प्रधानमन्त्री एवम् एमाले अध्यक्ष केपी ओलीले बिहीबार बिहान बल्खुमा निर्माण हुन लागेको एमाले केन्द्रीय कार्यालय भवनको शिलान्यास गरेका छन् । सो अवसरमा मन्तव्य दिँदै अध्यक्ष ओलीले माधव नेपालले देशभर नयाँ पार्टी खोलेर हिँडेको आरोप लगाए । नेपाल समूहले पार्टीमा उपद्रो गर्दै आए पनि भरसक अहिले पनि आफूहरु सम्झाउने प्रयासमा रहेको उनको भनाइ थियो ।

नेपाल समूहले अनुचित ढङ्गले पार्टी कब्जा गर्ने र कम्युनिष्ट आन्दोलन ध्वस्त पार्ने प्रयास गरेको आरोप लगाउँदै उनले अहिले पनि फ्लोर क्रस गर्ने तथा पार्टी हितविपरीतका गतिविधिलाई जारी राखेर नेपाल समूहले पार्टीविरोधि चरित्र उदांग तुल्याएको भन्दै आक्रोश प्रकट गरे । विगतमा आफूहरुलाई पार्टीविहीन बनाउन खोजिएको भन्दै अध्यक्ष ओलीले त्यो प्रयास असफल भएको बताए ।

^pict:rss