नेकपा (एमाले)का नेता माधवकुमार नेपालले राष्ट्रियसभा उपनिर्वाचनका लागि गृहमन्त्री रामबहादुर थापालाई ‘पूर्ण सहयोग रहने’ आश्वासन दिएका छन् । कोटेश्वरस्थित नेपाल निवासमा भेट गर्न पुगेका गृहमन्त्री थापासँगको भेटमा नेता नेपालले उपनिर्वाचनमा आफ्नो पूर्ण साथ र सहयोग रहने प्रतिबद्धता जनाएका गृहमन्त्रीका प्रेस संयोजक किरण भट्टराईले जानकारी दिएका छन् ।

नेपाल-थापा भेटवार्ताका क्रममा पार्टीको आन्तरिक विवाद समाधानका विषयमा समेत छलफल भएको बताइएको छ ।

तर, माधव नेपालका प्रेस सहयोगी मोहन गौतमले रामबहादुर थापालाई सहयोग गर्न नेता नेपाल तयार भएको भन्ने कुरा अफवाह मात्र भएको बताएका छन् । नेता नेपालसँग भेट गर्न बादल कोटेश्वर आएको जानकारी दिँदै गौतमले दुई नेताबीच मतदातालाई स्वविवेक प्रयोग गर्न दिने कुरामा मात्रै सहमति भएको उल्लेख गरेका छन् । खिमलाल देवकोटालाई आफैले उम्मेदवार बनाएकोले थापालाई सहयोग गर्न नसक्ने नेपालले प्रष्ट पारेका गौतमले सामाजिक सञ्जालमार्फत् जनाएका छन् ।

यही जेठ ६ गते राष्ट्रियसभाको उपनिर्वाचन (वाग्मती प्रदेश) हुँदै छ । नेकपा (एमाले) का तर्फबाट गृहमन्त्री थापा उम्मेदवार बनाइएका छन् । विपक्षी गठबन्धनबाट उक्त उपनिर्वाचनमा डा. खिमलाल देवकोटा उम्मेदवार छन् ।

गृहमन्त्री थापा नेकपा (एमाले) मा गएपछि नेकपा (माओवादी केन्द्र) का सिफारिशमा उनी पदमुक्त भएका थिए ।