जनता समाजवादी पार्टी नेपाल (जसपा) को कार्यकारिणी समितिको बैठक स्थगन भएको छ । जसपाका अध्यक्ष महन्थ ठाकुरले विज्ञप्ति जारी गर्दै यही जेठ ८ र ९ गतेका लागि बोलाइएको बैठक स्थगन गरेका हुन् ।

कोभिड–१९ बढ्दो महामारीको कारणले जेठ ८ र ९ गते बस्ने भनिएको पार्टीको केन्द्रीय कार्यकारिणी समिति बैठक अर्को सूचना नभएसम्म स्थगन गरिएको ठाकुरको विज्ञप्तिमा उल्लेख गरिएको छ । यसअघि जेठ ४ गते सूचना जारी गर्दै सो मितिमा बैठक बस्ने जनाइएको थियो ।

जसपाका अध्यक्ष उपेन्द्र यादव र सङ्घीय परिषद् अध्यक्ष बाबुराम भट्टराई पक्षले भने एकतर्फी रुपमा बैठक स्थगन गरिएकामा आपत्ति जनाएको छ ।

यसअघि ठाकुर र यादवले संयुक्त विज्ञप्ति जारी गर्दै वर्तमान सरकारमा सहभागी नभई आफ्नै दलका नेतृत्वमा सरकार गठन गर्न पहल गर्ने र नभए प्रतिपक्षमै रहेर भूमिका निर्वाह गर्ने सहमति भएको जनाएका थिए ।

यसैबीच अध्यक्ष ठाकुर र वरिष्ठ नेता राजेन्द्र महतो पक्षको संसदीय दलको बैठक शुक्रबार सिंहदरबारमा बसेको छ । उक्त बैठकका सम्बन्धमा यादव र डा. भट्टराई पक्षलाई जानकारी नगराइएको जनाइएको छ ।

ज्ञातव्य छ, ठाकुर-महतो समूहले संसदीय दलका नेतामा राजेन्द्र महतोलाई चयनसमेत गरिसकेको छ । सो पक्षले आफूसँग बहुमत सांसद रहेको दाबी गर्दै आएको छ ।