नेपाली कांग्रेसका नेता एवं पूर्व सूचना तथा सञ्चार राज्यमन्त्री तप्तबहादुर विष्टको निधनप्रति कांग्रेस सभापति शेरबहादुर देउवाले दुःख प्रकट गरेका छन् । सुर्खेत कांग्रेसका पूर्वसभापति विष्टको शनिबार राति ललितपुरस्थित मेडिसिटी अस्पतालमा निधन भएको हो ।

कोरोना संक्रमणका कारण गत जेठ १६ गतेदेखि कर्णाली प्रदेश अस्पतालमा उपचार हुँदै आए पनि सुधार नआएपछि बिष्टलाई जेठ २६ गते हेलिकप्टरमार्फत काठमाडौं ल्याइएको थियो । भेन्टिलेटरमा राखेर उपचार भैरहे पनि उनको स्वास्थ्यमा सुधार आउन नसकी शनिबार राति निधन भएको बताइएको छ ।

बिष्ट तत्कालीन शेरबहादुर देउवा नेतृत्वको सरकारमा राज्यमन्त्री बनेका थिए । उनको निधनप्रति समवेदना प्रकट गर्दै सभापति देउवाले भनेका छन्- ‘पूर्वराज्यमन्त्री एवं सुर्खेत कांग्रेसका पूर्वसभापति तप्तबहादुर विष्टको निधनको खबरले निकै दुखी भएको छु। तप्तजी एक निष्ठावान नेता हुनुहुन्थ्यो । उहाँको निधनले पार्टीलाई अपूरणीय क्षति भएको छ । उहाँको आत्माको चीरशान्तिको कामना गर्दै परिवारजनमा समवेदना व्यक्त गर्दछु ।’