पछिल्लो २४ घण्टामा थप ४२ जनाको मृत्यु

पछिल्लो २४ घण्टामा थप २,४४४ जनामा कोरोना भाइरसको संक्रमण पुष्टि भएको छ । ११,६४० जनाको परीक्षण गर्दा पीसीआर विधिबाट १,५०९ र एन्टिजेन विधिबाट ९३५ रहेका छन् ।

स्वास्थ्य तथा जनसंख्या मन्त्रालयका अनुसार यही अवधिमा थप ३,८५३ जना निको भएका छन् भने थप ४२ जनाको मृत्यु भएको छ ।

यसै क्रममा काठमाडौं उपत्यकामा २५ सिटभन्दा बढीका सार्वजनिक यात्रुवाहक सवारीसाधन जोरबिजोर प्रणालीमा सञ्चालन हुने भएका छन् । २५ सिट क्षमतामाथिका बस सञ्चालन गर्दा सिट क्षमताभन्दा बढी संख्यामा यात्रु नराख्ने गरी सञ्चालन गर्न पाइने बताइएको छ ।

बिहान ६ बजेदेखि साँझ ७ बजेसम्म सार्वजनिक सवारीसाधन सञ्चालन गर्न पाइने भए पनि माइक्रो बस सञ्चालनको अनुमति भने अझै दिइएको छैन ।

सार्वजनिक यात्रुवाहक सवारीसाधन सञ्चालन गर्दा स्वास्थ्य मापदण्डको पूर्ण परिपालन गर्दै भौतिक दूरी कायम हुने गरी सञ्चालन गर्न सक्ने प्रशासनिक निर्देशन रहेको छ । सार्वजनिक यातायात सञ्चालन गर्दा चालक, सहचालक तथा यात्रुले अनिवार्य मास्क लगाउने, सवारीसाधनको ढोकामा स्यानिटाइजरको व्यवस्था हुनुपर्ने, सहचालकले पञ्जा लगाउनुपर्ने र अनिवार्य रुपमा सवारी साधन दैनिक निसंक्रमित गर्नुपर्ने शर्त राखिएको छ।