नेकपा (माओवादी केन्द्र)ले आगामी पुसको दोस्रो साता राष्ट्रिय सम्मेलन आयोजना गरिने जनाएको छ । शनिबारदेखि शुरु भएको केन्द्रीय समितिको बैठकमा सो पार्टीका अध्यक्ष प्रचण्डले केन्द्रीय समितिमा प्रस्तुत गरेको राजनीतिक प्रस्तावअनुसार आगामी पुसको ११ देखि १३ गतेसम्म राष्ट्रिय सम्मेलन आयोजना गरिने छ ।
पार्टीलाई अवैध भन्दै नेकपा (एमाले) प्रवेश गरेका केही नेताले निर्वाचन आयोग र सर्वोच्च अदालतमासमेत निवेदन दिएको सन्दर्भमा माओवादीले राष्ट्रिय सम्मेलन आयोजना गर्ने प्रस्ताव गरेको हो ।
राष्ट्रिय सम्मेलनको लागि आगामी भदौ मसान्तभित्र पार्टी सदस्यता नवीकरण तथा वितरण अभियान चलाइनेछ । आगामी असोज १० गते सेल र टोल भेला गर्ने, २० गते वडा सम्मेलन, ३० गते पालिका सम्मेलन गर्ने र कात्तिक ३० गते जिल्ला सम्मेलन गर्ने प्रस्ताव गरिएको छ ।
प्रस्तावअनुसार आगामी मङ्सिर १५ गते प्रदेश सम्मेलन आयोजना गरिनेछ । बैठकमा अध्यक्ष प्रचण्डले विधान संशोधनको प्रस्ताव पेश गर्नुभएको छ । बैठकमा अध्यक्ष प्रचण्डले पेश गरेको राजनीतिक, विधान संशोधनलगायतका अन्य प्रस्तावमाथि छलफल गर्न विभिन्न आठ वटा समूहमा विभाजन गरिएको प्रवक्ता नारायणकाजी श्रेष्ठले जानकारी दिए ।
आइतबार बिहान ११ बजेसम्म दुवै प्रस्तावमाथि छलफल गरेर केन्द्रीय सदस्यले आवश्यक राय सुझाव दिने र छलफलबाट प्राप्त हुने निष्कर्ष बैठकमा पेश हुने, त्यसपछि आवश्यक संशोधनसहित पारित गर्ने कार्यसूची तय भएको प्रवक्ता श्रेष्ठको भनाइ छ ।
केन्द्रीय समितिको बैठक आज (आइतबार) ११ बजे पुनः बस्ने बताइएको छ ।
प्रतिक्रिया