समान राजनीतिक एजेन्डा भएका राजनीतिक दलहरूसँग निरन्तर संवाद तथा सहकार्यको अभियानअन्तर्गत नागरिक शक्ति नेपालका अध्यक्षसहितको प्रतिनिधिमण्डलले बुधबार (१७ असार) नेपाली काङ्ग्रेसका उपसभापति विश्वप्रकाश शर्मासँग राजनीतिक भेटघाट गरेको छ ।

भेटवार्ताका क्रममा नेपालको राष्ट्रिय हित, राष्ट्रिय एकता, सुशासन, समृद्धि तथा राष्ट्रको दीर्घकालीन भविष्यसँग सम्बन्धित समसामयिक राजनीतिक विषयमा गम्भीर र सकारात्मक छलफल भएको सो पर्टीले जनाएको छ ।

छलफलका क्रममा नेपालको राष्ट्रिय हितलाई केन्द्रमा राख्दै देशको वर्तमान अवस्था, राजनीतिक स्थायित्व, सुशासनको आवश्यकता तथा भविष्यप्रति दुवै पक्ष गम्भीर रहेको धारणा व्यक्त गरिएको छ । राष्ट्रिय हितका विषयमा संवाद, सहकार्य र सकारात्मक राजनीतिक संस्कृतिको विकास आजको आवश्यकता रहेकोमा समेत साझा समझदारी बनेको जनाइएको छ ।

नागरिक शक्ति नेपालले समान राजनीतिक एजेन्डा तथा राष्ट्रिय हितका विषयमा प्रतिबद्ध सबै राजनीतिक शक्तिहरूसँग रचनात्मक संवादलाई आगामी दिनमा पनि निरन्तरता दिँदै देश र जनताको हितमा सहकार्यका सम्भावनालाई थप सुदृढ बनाउने प्रतिबद्धता व्यक्त गरेको छ ।