सूचनाको हकका लागि राष्ट्रिय महासंघ नेपालको बाग्मती प्रदेशको दोस्रो सम्मेलन तथा ‘प्रमाणमा आधारित पत्रकारिताका लागि सूचनाको हक’ विषयक प्रादेशिक अन्तरक्रिया कार्यक्रम बुधबार (१७ असार)देखि ललितपुरको गोदावरीमा सुरु भएको छ । सञ्चार तथा सूचना प्रविधि मन्त्रालय, युरोपेली युनियन र इन्टरनेसनल आइडिया (International IDEA) को सहयोगमा आयोजित उक्त दुईदिने कार्यक्रमको भव्य उद्घाटन गरिएको हो ।

कार्यक्रमको उद्घाटन सत्रलाई सम्बोधन गर्दै प्रमुख अतिथि एवं राष्ट्रिय सूचना आयोगका पूर्व प्रमुख आयुक्त महेन्द्रमान गुरुङले मुलुकमा सुशासन प्रवर्द्धन गर्न र भ्रष्टाचार अन्त्यका लागि सूचनाको हक अपरिहार्य औजार भएको बताउनुभयो । उहाँले राज्यका हरेक निकायलाई पारदर्शी र उत्तरदायी बनाउन नागरिक तहबाट सूचनाको माग र प्रयोग व्यापक हुनुपर्नेमा जोड दिनुभयो । ‘सूचना मागौँ, भ्रष्टाचारको अन्त्य गरौँ’ भन्ने मूल नारालाई आत्मसात् गर्दै अघि बढे मात्रै लोकतन्त्र बलियो हुने उहाँको भनाइ थियो ।

सोही अवसरमा वरिष्ठ पत्रकार रामकृष्ण रेग्मीले ‘प्रमाणमा आधारित पत्रकारिताका लागि सूचनाको हकको प्रयोग’ विषयमा केन्द्रित रहेर सहभागी सञ्चारकर्मी तथा सूचनाका अभियन्ताहरूलाई विशेष प्रशिक्षण प्रदान गर्नुभएको थियो । उहाँले सतही कुराका पछि लाग्नुभन्दा तथ्य र प्रमाण जुटाएर गरिने पत्रकारिता बढी विश्वसनीय, वजनदार र प्रभावकारी हुने चर्चा गर्नुभयो ।

मिडिया ट्रायलको मारमा परेको पूर्वआयुक्तको गुनासो

कार्यक्रममा विशिष्ट अतिथिका रूपमा सहभागी राष्ट्रिय सूचना आयोगकी पूर्व आयुक्त सविता भण्डारीले आफू नियोजित ‘मिडिया ट्रायल’को सिकार भएको भन्दै गुनासो पोख्नुभयो । सञ्चारमाध्यम र पत्रकारहरूले यथार्थ र सत्यतथ्य नबुझी, एकपक्षीय रूपमा आफूविरुद्ध समाचार सम्प्रेषण गरेको आरोप उहाँले लगाउनुभयो । यद्यपि, आफूमाथि लागेका आरोप वा विवादको वास्तविक सत्य के हो भन्नेबारे भने भण्डारीले कार्यक्रममा विस्तृत रूपमा खुलाउन चाहनुभएन ।

बाग्मती प्रदेशका विभिन्न जिल्लाबाट आएका सूचनाका अभियन्ता, नागरिक समाजका प्रतिनिधि र पत्रकारहरूको उल्लेख्य सहभागिता रहेको यो प्रादेशिक सम्मेलन तथा अन्तरक्रिया कार्यक्रम भोलि असार १८ गतेसम्म सञ्चालन हुने अध्यक्ष उमिद बागचनले जनाउनुभयो । कार्यक्रममा सूचनाको हकको कार्यान्वयनको अवस्था, विद्यमान चुनौती र आगामी कार्यदिशाबारे गहन छलफल हुने बताइएको छ ।