गत साता मुटुमा समस्या देखिएपछि आफ्नै अस्पताल नर्भिकमा एन्जियोग्राफी गराएका वसन्त चौधरी त्यसलगत्तै घुमघाम गर्ने भन्दै सपरिवार दुबई पुगे । तर, दुबइमा उनलाई हर्ट एट्याक भएको र त्यहीँ मुटुको शल्यक्रिया गर्ने तयारी भइरहेको भन्ने प्रसङ्ग यतिबेला विशेष चासोको विषय बन्न पुगेको छ ।

वसन्त चौधरीको दुबईमा मुटुसम्बन्धी उपचार भइरहेको सन्दर्भलाई लिएर विभिन्न टीकाटिप्पणी शुरु भएका छन् । आफ्नै अस्पतालमा विश्वसनीय उपचार हुन नसक्ने ठानेर चौधरी घुमफिरको बहाना बनाइ दुबई पुगेको आँकलन गरिएको छ ।

मुटुमा समस्या देखिएपछि सोसम्बन्धी प्राथमिक उपचार नर्भिकमा गरी सुझबुझका साथ उनी दुबईतर्फ लागेको दाबी गरिएको छ । सुत्रका अनुसार उपचारकै लागि दुबई गएको भन्ने तथ्य सार्वजनिक गर्दा नर्भिक अस्पतालप्रति गलत अवधारणा निर्माण हुन सक्ने भएकोले योजनावद्ध रुपले उनी सपरिवार घुमफिरको बहाना बनाएर दुबई पुगेका हुन् । दुबईमै हर्ट एट्याक भएपछि उपचारका लागि नर्भिक फर्कने सवाल रहन्न, त्यसैले दुबईमा रहेको बेला हर्ट एट्याक भएको भन्ने समाचार सम्प्रेषण गराइएको हो । तर चौधरीलाई त्यहाँ हर्ट एट्याक भएको नभई नर्भिकमै समस्या पहिचान भएपछि थप उपचारका लागि उनी दुबईस्थित अमेरिकन हस्पिटल पुगेका स्रोत बताउँछ ।

नेपाली मिडियामा आफ्नो स्वास्थ्यबारे चासोका साथ विभिन्न कोणबाट समाचार सम्प्रेषित भएपछि वसन्त चौधरीले सामाजिक सञ्जालमार्फत् स्पष्टोक्ति सार्वजनिक गरेका छन् । गत साता मुटुमा असहजता महसूस भएपछि नर्भिकमै एन्जियोग्राफी गराएको र त्यसपश्चात दुबईस्थित अमेरिकन हस्पिटलमा थप जाँच गराउँदा विशेषज्ञहरुले मुटुको धमनीको उपचार गराउन सुझाव दिएको चौधरीले आफ्नो विज्ञप्तिमा उल्लेख गरेका छन् । उद्यमी, समाजसेवी एवम् कवि वसन्त चौधरीको मुटुको स्वास्थ्य सामान्य नै रहेको नर्भिक अस्पतालले जनाएको छ ।