कोभिड विरुद्धको खोप नलगाएकाले आफूलाई सान्तोस बनाम ग्रेमियो फुटबल म्याचमा प्रवेश निषेध गरिएको ब्राजिलका राष्ट्रपति जैर बोल्सोनारोले जानकारी दिएका छन् ।

राष्ट्रपति बोल्सोनारोले प्रेससँग गरेको कुराकानीको भिडियो सार्वजनिक भएको छ जसमा राष्ट्रपतिले आफूमा खोप लगाएको व्यक्तिमा भन्दा बढी एन्टिबडी भएको दाबी गरेका छन् । उनले भनेका छन्, ‘किन खोप कार्ड चाहियो ? किन पासपोर्ट चाहियो ? म केवल खेल हेर्न चाहान्छु ।’

एएनआईले जनाएअनुसार राष्ट्रपति बोल्सोनारो हाल साओ पाउलोमा बिदामा छन् ।

ब्राजिलका नेताले कोरोना भाइरसविरुद्धको खोपप्रति शंका व्यक्त गर्ने गरेका छन् र त्यहाँ उल्लेख्य मात्रामा खोप लगाइएको पनि छैन । उनी जुलाई २०२० मा कोरोनाभाइरसबाट सङ्क्रमित भएका र केही हप्ता क्वारेन्टिनमा बसेपछि नियमित काममा फर्किएका थिए ।

राष्ट्रपति बोल्सोनारो लकडाउनको एक कट्टर विरोधी हुन् भने उनी मास्क पनि लगाउँदैनन् ।