सन् २०२२ देखि इन्डियन प्रीमियर लिग (आईपीएल) मा १० टीमको सहभागिता जनाउने भएका छन् । थपिएका नयाँ दुई टीममा अहमदावाद र लखनउ रहेका छन् । भारतीय क्रिकेट कन्ट्रोल बोर्ड (बीसीसीआई)ले संयुक्त अरब इमिरेटको दुबईमा आयोजना गरेको लिलाम बढाबढ प्रक्रियामा यस कुराको टुङ्गो लागेको हो । बीसीसीआईले यी दुई टीमलाई बेचेर १२ हजार करोड भारतीय रुपैयाँ कमाएको छ ।

बीसीसीआईका अनुसार लखनउ टीमलाई संजीव गोयन्काले खरिद गरेका छन् । उनले लखनउ टीमका लागि ७ हजार ९० करोड रुपैयाँ खर्च गरेका छन् । जुन आइपीएलको सबैभन्दा महङ्गो टीम बनेको छ । त्यस्तै, अहमदावाद टीमलाई विदेशी ग्रुप सीभीसीले ५ हजार ६ सय करोडमा खरिद गरेको छ । यो लग्जमवर्गको कम्पनी हो ।

बीसीसीआईले यी दुवै टीमको लागि २ हजार करोडको बेसिक प्राइस राखेको थियो । बीसीसीआईले लिलाम प्रक्रियामा जाँदा ८ हजार करोड कमाउने अनुमान लगाए पनि १२ हजार करोड कमाउन सफल भएको थियो ।

आईपीएलको नयाँ टीम खरिद गर्नको लागि विभिन्न स्वदेशी तथा विदेशी कम्पनीहरूले लिलाम प्रक्रियामा सहभागिता जनाएका थिए । जसमा म्याचेस्टर युनाइटेडका मालिक ग्लेजर फेमिलीदेखि अडानी ग्रुप, हिन्दुस्तान मिडिया ग्रुप, कोटाक ग्रुफ अल कार्गोे ग्रुप, केप्री ग्लोबल, सीबीसी ग्रुप, आरी सीजी ग्रुप र टोरेन्ट स्पोर्टसले दाबेदारी प्रस्तुत गरेका थिए ।

लिलामीमा सहभागी हरेक कम्पनीले दस लाख भारतीय रुपैयाँको डिपोजिट फर्म भरेका थिए, जुन फिर्ता हुँदैनथ्यो । जुन कम्पनी वा व्यक्तिले सबैभन्दा बढी अफर गर्थ्यो त्यसले दुईमध्ये जुनसुकै टीमलाई रोज्न पाउँथ्यो । यसै कुरालाई मध्यनजर राख्दै गोयन्का ग्रुपले सबैभन्दा बढी अफर गरेर लखनउ टीमलाई चुनेको थियो । त्यस्तै दोश्रो सबैभन्दा ठूलो अफर गरेको सीबीसी ग्रुपले अमहदावाद टीम प्राप्त गरेको थियो ।

आईपीएल २०२२ मा अब कुल ७४ खेल हुनेछन् । जसमा १० टीमले सहभागिता जनाउने छन् । हरेक टीमले सात खेल आफ्नो गृहमैदान र बाँकी ७ खेल अर्को टीमको मैदानमा खेल्नुपर्ने छ । हरेक टीमले लीगको १४ खेल खेल्नेछन् । यसपछि प्लेअपका लागि स्थान बनाउनुपर्ने छ ।