ग्राण्डीमा बेहोस भेटिएका न्युरोसर्जनको मृत्यु, आत्महत्याको आशंका

ग्राण्डीमा बेहोस भेटिएका न्युरोसर्जनको मृत्यु, आत्महत्याको आशंका



बेहोस अवस्थामा फेला परेका काठमाडौंको टोखा निवासी एक चिकित्सकको मृत्यु भएको छ ।

ग्राण्डी टावरको माथिल्लो तलामा रहेको आफ्नै कोठामा सोमबार बेहोस अवस्थामा फेला परेका न्युरोसर्जन डा. सुवास लोहनीको मृत्यु भएको महानगरीय प्रहरी परिसर काठमाडौंले जनाएको छ । लोहनी नेशनल न्यूरो सेन्टरमा कार्यरत थिए ।

महानगरीय प्रहरी कार्यालय काठमाडौंका प्रवक्ता प्रहरी उपरीक्षक सुशीलसिंह राठौरका अनुसार शव परीक्षणका लागि आज महाराजगञ्जस्थित शिक्षण अस्पतालमा ल्याइएको छ ।

डा. लोहनी आफैंले बेहोस हुने औषधि इन्क्सन लिएको पाइएको प्रहरीले जनाएको छ । प्रहरीलाई उद्धृत गर्दै राससले जनाएअनुसार ओभरडोज भएर मृत्यु भएको जस्तो देखिन्छ, सुसाइड नोटसमेत फेला परेकाले आत्महत्या गरेको अनुमान गरिएको छ । शव परीक्षणको प्रतिवेदन आएपछि मृत्युको कारण यकिन हुने बताइएको छ ।

सोमबार दिउँसो १ बजेसम्म फोन गर्दा ठीक रहेको र तीन बजे बेहोस अवस्थामा फेला परेको परिवारको भनाई उद्धृत गर्दै प्रहरीले जानकारी दिएको छ । उनमा एक हप्ताअघि मात्रै कोभिड–१९ को सङ्क्रमण भएको थियो । प्रहरीको प्रारम्भिक अनुसन्धानमा केही अघिदेखि नै डा. लोहनी एक्लै बोल्ने, बस्ने गरेको पाइएको छ । साहित्य क्षेत्रमा समेत रुचि राख्ने डा. लोहनी सञ्चारमाध्यममा लेखसमेत लेख्ने गर्दथे ।