महिलाहरु विद्यालय जान पाउने, इच्छाबमोजिम बिहे गर्न सक्ने

अफगानिस्तानमा सत्ता सञ्चालन गरिरहेका तालिबानहरुले महिलाको अधिकारको रक्षा गर्ने जनाएका छन् । महिला अधिकारको रक्षा गर्न नसकेको भनेर विश्वमा नै तालिवानको आलोचना भइरहेका बेला उनीहरुले यस्तो प्रतिबद्धता सार्वजनिक गरेका हुन् ।

तालिबानी सर्वोच्च नेताले सो अधिकारको रक्षाका लागि भन्दै निर्देशिका जारी गरेका सिन्ह्वाले जनाएको छ । तालिबान सरकारका सर्वोच्च नेता हैबतुल्लाह अखुन्जादाले शुक्रबार निर्देशिका जारी गरेका हुन् । निर्देशिकामा महिलालाई स्वतन्त्रता दिइएको बताइएको छ । महिलाहरु विद्यालय जान पाउने र विवाहका क्रममा पनि महिलामाथि कुनै दबाब दिन नपाइने सो निर्देशिकामा जनाइएको छ ।

त्यसैगरी महिलालाई उनीहरुका अधिकारमा जबर्जस्ती गर्न नपाइने बताइएको छ । एकल महिलाले पनि आफ्नो इच्छाबमोजिम विवाह गर्न पाउने कुरा पनि सो कानुनमा उल्लेख छ । त्यसैगरी कुनै पनि व्यक्तिले एकभन्दा बढी श्रीमती राखेको छ भने पनि उसले इस्लामिक कानुनअनुसारका अधिकार महिलालाई दिनुपर्ने कुरा पनि सो कानुनमा जारी गरिएको बताइएको छ ।

अफगानिस्तानमा महिला अधिकार हनन् भएका कैयौँ उदाहरणहरु रहेका छन् ।अहिले तालिबानहरु सत्तामा आएपछि पनि उनीहरुले महिला र बालबालिकालाई अधिकार नदिएका र दबाब दिएका भनी विश्वव्यापी रुपमा आलोचना भएको थियो ।