चुनौतीपूर्ण काम गरेर देशको चिनारी दिनुका साथै जलवायु परिवर्तनका कारण विश्वमा देखापरेको नकारात्मक प्रभावबारे जनचेतना जगाउने उद्देश्यले शुभप्रसाद शर्माले विश्व भ्रमणको तयारी गरेका छन् । आगामी जनवरी १ (सन् २०२२) देखि विश्व भ्रमणमा निस्कने शुभले जानकारी गराए ।
साइकलद्वारा गरिने विश्व भ्रमण उनको ‘एकल यात्रा’ हुनेछ । यसको लागि अन्तिम तयारीमा रहेको शुभ शर्माले बताएका छन् । साइकलद्वारा विश्व भ्रमणमा निस्किएका विश्वका थुप्रै व्यक्तित्वहरूद्वारा प्रभावित शुभले आफूले पनि यस यात्रालाई एउटा महत्वपूर्ण अभियानको रूपमा लिएको खुलासा गरेका छन् ।
यतिबेला विश्व कोभिड महामारीको प्रकोपबाट आक्रान्त छ । कोरोना भाइरसको नयाँ भेरियन्ट ओमिक्रोनसमेत देखापरिसकेको अवस्था छ । यस्तो परिवेशमा विश्व भ्रभण गर्न अनुकुल र सोचेजस्तो सहज पक्कै छैन, र पनि विश्व भ्रमणको लागि विभिन्न निकायबाट पाएको हौसला, शुभेच्छा र सहयोगले शुभ निकै उत्साहित बनेका छन् । साहस जुटाएर नयाँ वर्ष २०२२ को शुभारम्भसँगै उनी विश्व भ्रमणमा निस्किने भएका छन् ।
आफ्नो विश्व भ्रमण योजनालाई अभियानको रूपमा लिएका शुभले आफ्नो एकल यात्रालाई सम्पूर्ण मानवजातिसँग सरोकार राख्ने जलबायु परिवर्तन र तापक्रम वृद्धिसँग सम्बन्धित रहेको बताए । आज वातावरणमा भएको कार्वन उत्सर्जन र हरितगृह वायुको कारण १.५ डिग्री अधिक तापमान सहन विश्व ब्रह्माण्ड विवश बनेको छ । जसले गर्दा वातावरणमा पूर्णरूपमा असन्तुलन आएको छ । त्यसको प्रभावले कतै अतिवृष्टि, कतै हिमपात, कतै आँधितुफान र कतै भूक्षय भैरहेको छ ।
त्यस्तै, हिमालमा हिउँ नपर्ने वा तुरुन्तै पग्लने अनि उच्च हिमाली क्षेत्रमा हिउँको सट्टा पानी पर्ने भएकोले जनजीवन निकै प्रभावित भएको छ । जलबायु परिवर्तनलाई कसरी रोकथाम गर्ने अनि १.५ डिग्री तापक्रमलाई कसरी सीमित गर्ने भन्ने सम्बन्धमा हालसालै स्कटल्याण्डको ग्लास्गो सम्मेलनले एउटा प्रतिबद्धता पत्र पारित गरेको छ । जसमा विश्वका करिव ११५ राष्ट्रले समर्थन जनाएका छन् । यस सम्बन्धमा संयुक्त राज्य अमेरिका र चीनले जनाएको प्रतिबद्धताले पनि यो कुरालाई प्रमाणित गर्छ ।
‘सन्दर्भ तीन वर्षअघिको हो, त्यसबेला जलवायु परिवर्तन र बढ्दो तापक्रमलाई कसरी नियन्त्रण गर्न सकिन्छ भन्ने सोच मेरो मनमा पलाएको थियो । केहि समयपछि यो विषयमा साथीहरुसँग भएको छलफल र उनीहरूकै सल्लाहबमोजिम म साइकलद्वारा विश्व भ्रमण गर्ने निर्णयमा पुगेँ’- शुभको भनाइ छ । आफ्नो उक्त निर्णयलाई शिशिर हमाल र सरलाजीले साथ दिएकै कारण यो अभियानको शुभारम्भ भएको उनको भनाइ छ ।
विश्व भ्रमणको.अभियानमा १५० राष्ट्र घुम्ने र करिव ५०० रुख रोप्ने योजना शुभले बनाएका छन् । यसबाट विश्वमा बढिरहेको तापक्रमलाई न्यूनीकरण गर्न केही योगदान पुग्ने उनले विश्वास लिएका छन् । यो कार्य गर्न सहज नभइ निकै चुनौतीपूर्ण रहेको उल्लेख गर्दै उनले सबै तह तप्का, संघसंस्था, सरकार र अन्तर्राष्ट्रिय समुदायको साथ र सहयोग अपेक्षा गरेको बताए ।
नेपाल खेलकुद महासंघको ब्यानरमा विश्व भ्रमणको यात्रा आरम्भ गर्ने शुभले भनाइ छ । महासंघबाटै अहिले सम्पूर्ण कार्य अगाडि बढिरहेको पनि उनले जानकारी गराए । साथै यो भ्रमणको लागि काममा वडा नम्बर ७ समिति र बुढानिलकण्ठ नगरपालिकाले शुभलाई विद्युतीय साइकल प्रायोजन गरेको छ । बाग्मती प्रदेशका प्रदेससभा सदस्य नरोत्तम वैद्यबाट पनि आफूलाई विशेष सहयोग मिलेको उनले जानकारी दिए ।
प्रतिक्रिया