राष्ट्रिय खेलकुद परिषदका निवर्तमान सदस्यसचिव रमेशकुमार सिलवाललाई परिषदको सदस्यसचिवमा पुनर्वहाली गर्न सर्वोच्च अदालतले अन्तरिम आदेश दिएको छ । आफूलाई जबर्जस्ती अवैधानिक तवरले हटाइएको भन्दै सिलवालले सर्वोच्चमा रिट दर्ता गरेका थिए ।
सर्वोच्चका न्यायाधिश हरि फुयाँलको एकल इजलासले सिलवाललाई पुनर्बहाली गर्न अन्तरिम आदेश दिएको हो ।
इजलासले युवा तथा खेलकुद मन्त्रालयले नियुक्त गरेका नयाँ सदस्य सचिव टंकलाल घिसिङलाई काम गर्न नदिन आदेश दिएको छ ।
ओली सरकारले नियुक्त गरेका तर अहिलेको सरकारले हटाएका नेपाल स्काउटका लोकबहादुर भण्डारी, युवा स्वरोजगार कोषका कल्याण रोक्का र राष्ट्रिय प्रकृति संरक्षण कोषका डा. कृष्णप्रसाद ओली पनि अदालतबाट अन्तरिम आदेशमार्फत पुनर्वहाली भएका छन् ।
प्रतिक्रिया