file photo
नेकपा (एमाले)का उपाध्यक्ष सुरेन्द्र पाण्डेले बिनाशर्त कुनै पनि सहायता नपाइने तर्क गरेका छन् । प्रेस चौतारी नेपाल चितवन शाखाले सोमबार आयोजना गरेको पत्रकार सम्मेलनमा उनले जुनसुकै देश वा दाताले दिने सहायतामा शर्त हुने गरेको स्पष्ट पारेका हुन् ।
पूर्व अर्थमन्त्रीसमेत रहेका नेता पाण्डेले एमसिसिका सन्दर्भमा सोधिएको प्रश्नमा सहायता र ऋणमा पनि सर्त हुने जिकिर गरे । उनले भने, ‘कतिपयले नबुझेर टिकाटिप्पणी गरेका छन्, सहायता र ऋण बिनाशर्त आउँदैन ।’
अन्य विभिन्न देशबाट ऋण र अनुदान लिँदा सम्बन्धित ठेकेदारलाई ठेक्का दिने गरी लिने गरेको उनको भनाइ छ । पूर्वअर्थमन्त्री पाण्डेले सहायता प्राप्त गर्ने विधि थाहा नहुँदा धेरैलाई बिनाशर्त आउँछ भन्ने भान परेको बताए ।
एमसीसीमा पनि शर्त रहेको भन्दै उनले ती शर्त देशको हितमा छ भने मान्न पर्ने र हितमा छैनन् भने मान्न नहुने धारणा राखे । एमसीसीको विषयमा टिप्पणी गर्दै पाण्डेले रकम ठूलो कुरा नभए पनि यो राजनीतिक सम्बन्धमा गयो भने गम्भीर समस्या ल्याउन सक्ने उल्लेख गरे ।
अमेरिकासँगको सम्बन्ध अरुको जस्तो थप जटिल बनिदियो भने भविष्यमा वैदेशिक सहायता वा ऋणको पक्ष कमजोर बनेर जान सक्ने उनको चिन्ता थियो । यस्तो परिस्थितिमा बुद्धिमत्तापूर्ण ढङ्गले समस्याको सम्बोधन गर्नुपर्ने पाण्डेको भनाइ छ । यद्दपि सरकारले जिम्मेवार बनेर काम गर्न नखोजेको उनको आरोप थियो ।
देशमा व्यवस्थापिका, कार्यपालिका र न्यायपालिकासँगै अर्थतन्त्रमा जटिल समस्या देखिएको भन्दै नेता पाण्डेले यसको समाधान निर्वाचन नै भएको दाबी गरे ।
प्रतिक्रिया