अप्ठ्यारो परिस्थितिका बाबजुद समुदायको हितका पक्षमा काम गर्ने गौरी जोशीको प्रतिवद्धता
गैरआवासीय नेपाली संघका नवनिर्वाचित महासचिव गौरीराज जोशीले आफूले पाएको जिम्मेवारीलाई सहजताका साथ निभाउने सार्वजनिक प्रतिवद्धता जाहेर गरेका छन् । सामाजिक सञ्जालमार्फत जोशीले जनाएको प्रतिवद्धतामा लेखिएको छ- ‘प्राप्त भएको पद मेरो लागि महत्वपूर्ण विषय होइन, मैले निभाउने उत्तरदायित्व मेरो लागि महत्वपूर्ण हुनेछ । साथै, हामी मिलेर गैरआवासीय नेपालीहरुका महत्वपूर्ण मुद्दामा काम गर्नु आजको आवश्यकता हो ।’
संघका नवनिर्वाचित महासचिव जोशीको भनाइ जस्ताको तस्तै :
यसपटक केही असहज परिस्थितिमा गैरआवासीय नेपाली संघ (एनआरएनए)को अधिवेशन र नेतृत्व चयन भएको छ । यो अधिवेशनले मलाई महासचिवको जो जिम्मेवारी प्रदान गरेकोछ, यो मेरा लागि अवसर र चुनौती दुवै हो ।
मेरो विचारमा पद लिनु मात्र महत्वपूर्ण होइन, पदीय जिम्मेवारीअनुसार विदेशमा बस्ने नेपालीको हकहितका लागि काम पनि गरेर देखाउनुपर्छ भन्ने पक्षमा म छु । म महासचिव रहँदा विदेशमा बस्ने नेपाली समुदायको हकहितका लागि मिहिनेतका साथ काम गर्नेछु भन्ने विश्वास यहाँहरुलाई दिलाउन चाहन्छु । मेरो काम हेरेर १८ महिनापछि यहाँहरुले मलाई पुनः बधाई दिनुभयो भने मात्र म आफैलाई सफल भएको मान्नेछु ।
विगत केही महिनायता एनआरएनएभित्र जे भयो त्यो हुन हुँदैनथ्यो भन्ने यहाँहरुको भनाइसँग म पनि सहमत छु । संस्था ठुलो हुँदै जाँदा एउटा कालखण्डमा विभिन्न धारणाहरु आउनु अस्वभाविक भने होइन । यसबाट पाठ सिकेर हामी विदेशमा बस्ने नेपाली एकजुट भएर अगाडि बढ्यौँ भने हाम्रो उद्देश्यप्राप्ति अझ सहज हुने छ भन्ने मलाई लागेको छ ।
विदेशमा बस्ने नेपालीका थुप्रै मुद्दाहरु छन् । विदेशमा मिहिनेत गरेर कमाएको पैसाले घरका लागि एउटा टेलिभिजन ल्याउँदा कति इन्च भनेर सोधिन्छ । विदेशमा कमाएको पैसा स्वदेशमा लगानी गर्न खोज्दा झमेलाहरु छन् । नेपाली नागरिकताको निरन्तरता हुदां देशलाई कुनै बेफाइदा छैन । फाइदा मात्र छ । यसबारेमा हामीले अझ राम्रोसँग बुझाउन सकेका छैनौँ ।
हाल नेपालका आर्थिक तथ्यांकहरुले संकट आउने संकेत गरिरहेका छन् । विदेशी मुद्राको सञ्चिति घटेको छ । यो संकटलाई कम गर्न हामीले सरकारसँग मिलेर काम गर्न सक्छौँ । विदेशमा बस्ने नेपालीको बचतलाई देशमा लगानी गर्ने उद्देश्यले स्थापना भएको १० अर्ब रुपैयाँको एनआरएनए लगानी कोषको काम अगाडि बढेको छ । यसलाई छिटो कार्यान्वयनमा ल्याउनुपर्ने चुनौती छ ।
हामीबीचको मजबुत सञ्जाल नै हाम्रो बल हो । मिलेर जाँदा हाम्रा मुद्दाहरु राख्न सहज हुन्छ । अब आग्रह र पुर्वाग्रह राखेर कसैलाई केही फाइदा छैन । गोलवद्ध भएर उत्साहका साथ अगाडि बढ्दै एनआरएनए अभियानलाई अगाडि लैजान म सधैँ सकरात्मक र तत्पर रहने छु ।
एनआरएनए अभियानमा लाग्नुभएका सबैको सहयोग, सुझाव र सल्लाहका लागि म अनुरोध गर्दछु । यसले मलाई महासचिवको जिम्मेवारी अनुसार काम गर्न अझ प्रेरणा र हौसला मिल्नेछ । मलाई साथ दिनुहुने सबैप्रति हार्दिक आभार व्यक्त गर्दछु ।
गौरीराज जोशी
महासचिव , एनआरएनए
प्रतिक्रिया