प्लास्टिक टनेल वितरणका क्रममा उत्पन्न विवादले खोटाङको हलेसी तुवाचुङ नगरपालिका-१ बाहुनीडाँडामा एउटै सडकको तीन ठाउँमा बन्द गरिएको छ । वडा कार्यालयबाट प्लास्टिक टनेल वितरण गर्नेक्रममा सुरु भएको विवादका कारण बाहुनीडाँडाको राँगाकाटे-वडा कार्यालय-निङ्लाम-पकन्चेप-झाप्पा-डुम्रे-रुपटार-कुर्ले सडकको फरक-फरक तीन स्थानमा अवरोध हालिएको हो ।

प्लास्टिक टनेल वितरणका क्रममा विभेद गरिएको भन्दै स्थानीय आमा समूहले ११ जेठ साँझ पकन्चेपमा घोचो गाडेर मुढा तेर्स्याएर सडक बन्द गरेपछि सोही सडकको थप दुई स्थानमा अवरोध हालिएको हो ।

आमा समूहले पकन्चेपमा सडकमा छेकाबार हाले लगत्तै क्रमशः तल्लो झाप्पा र पकन्चेपमै सडकमा अवरोध हालिएको छ । पकन्चेपमा नजिक दूरीमा दुई स्थानमा सडकमा छेकाबार लागेको स्थानीयले बताएका छन् ।

बाहुनीडाँडामा कांग्रेसकातर्फबाट रुद्रकुमार राई दोस्रोपल्ट वडाध्यक्षमा निर्वाचित भएका हुन् । पकन्चेपमा सुरुमा माओवादी केन्द्रको उक्साहटमा सडक छेक्ने काम भएको कांग्रेसको दाबी छ । त्यसकै प्रतिक्रिया स्वरूप सोही सडकको अन्य खण्डमा शृङ्खलाबद्ध अवरोध राखिएको कतिपयको विश्लेषण छ ।

पकन्चेपमा आमा समूहले सडक छेकेपछि सोही नजिकै आइतबार कांग्रेसमा आबद्ध स्थानीयले अर्को छेकाबार हालेका छन् । उनीहरूले सडकले मिचेको जग्गाको मुआब्जा दिइनुपर्ने, विद्युत्को पोललाई सार्नुपर्ने, जग्गामा पर्खाल हालिदिनुपर्ने लगायतका माग देखाएर सडकका फरक-फरक ठाउँमा छेकबार हालेका हुन् ।

किसानलाई वितरणका लागि वडा कार्यालयले निर्वाचनअघि २७० थान प्लास्टिक टनेल ल्याएको थियो । निर्वाचन आचारसंहिता लागू भएको अवस्थामा बाँड्न सुरु गरिएको भन्दै विरोध भएपछि प्लास्टिक टनेल बाँड्ने काम रोकिएको थियो । नागरिकताको फोटोकपी, खाल्डो खनेको तस्बिर र वडाको सिफारिसका आधारमा प्लास्टिक टनेल वितरण गर्ने भनिएको थियो । तर पक्षपातपूर्ण तरिकाले प्लास्टिक टनेल वितरण भएकाले सडक बन्द गरिएको स्थानीय संगीता राईले बताइन् ।

‘खाल्डो नखनेका परिवारलाई पनि प्लास्टिक टनेल दिइयो । कतिपयलाई घरैमा प्लास्टिक टनेल पठाउने काम भयो । सुक्खाग्रस्त ठाउँलाई प्राथमिकता दिइएन,’ संगीताले भनिन्, ‘यही सडक खन्ने क्रममा फिर्ता दिनेगरी उठाइएको पैसा हालसम्म फिर्ता दिइएको छैन । त्यो पैसा फिर्ता पाउनुपर्छ भन्ने पनि हाम्रो माग हो ।’

स्थानीय दयाबहादुर राईले पनि मापदण्ड विपरीत प्लास्टिक टनेल वितरण गर्दा समस्या निम्तिएको बताए । वडाध्यक्ष राईले भने प्लास्टिक टनेल वितरणमा विभेद नगरेको दाबी गरेका छन् । ‘खाल्डो खनेर १५-२० जनाले मात्र प्लास्टिक टनेल लगेका छन्, अरूलाई सिफारिसका आधारमा दिइएको हो । प्रक्रिया पुरा गरेर आउनेलाई रित्तो फर्काउँदैनौँ । नपुगे नगरपालिकाबाट ल्याएर वितरण गर्छौँ,’ वडाध्यक्ष राईले भने, ‘खाल्डो खनिसकेका र सिफारिस भएका अशक्तलाई घरैमा पठाइदिएका हौं । विपक्षी साथीहरूबाट राजनीतिक इस्यू बनाउने काम भएको छ ।’

सडकमा चार ठाउँ अवरोध भइरहँदा समस्या समाधानमा भने हालसम्म कसैको पहलकदमी भएको छैन ।