भारतको एउटा प्रयोगशालामा ग्यास चुहावटका कारण बिरामी भएका १५० जना अस्पताल भर्ना भएका छन् ।

बिरामीमध्ये अधिकांश महिला कामदार रहेका छन् । शुक्रबार भएको घटनामा परी बिरामी भएकाहरूलाई विभिन्न अस्पतालमा भर्ना गरेर उपचार गराइएको छ ।

भारतको आन्ध्र प्रदेशमा रहेको औषधी उद्योगको प्रयोगशालामा प्रयोग हुने ग्यास चुहिएर त्यहाँ रहेका श्रमिक तथा कर्मचारीहरु बिरामी भएका हुन् । आन्ध्र प्रदेशको अनाकापली जिल्लामा घटना भएको हो ।

‘घटनामा परी बिरामी भएका १५० भन्दा बढीलाई अस्पताल भर्ना गरिएको छ, उनीहरुलाई अहिले निगरानीमा राखेर उपचार भइरहेको छ,’ जिल्ला चिकित्सा तथा स्वास्थ्यप्रमुख हेमन्त अनाबाथुलले भनेका छन् ।

ग्यास चुहावटको कारण अहिलेसम्म स्पष्ट हुन नसकेको र घटनाका बारेमा अनुसन्धान सुरु भइसकेको प्रहरीले जनाएको छ ।

ग्यास चुहिएपछि प्रयोगशालामा रहेकाहरुमा बान्ता हुने, रिङ्गटा लाग्ने, अचेत हुने, कमजोरी हुने श्वास प्रश्वासमा समस्या हुने लगायतका लक्षण देखापरेको थियो ।