काङ्ग्रेसले टिकट नदिएपछि युवा नेता एवम् बहुचर्चित सांसद डा. अम्रेसकुमार सिंह स्वतन्त्र उम्मेदवार बनेर चुनावी मैदानमा उत्रिनुभएको छ । काङ्ग्रेस सभापति शेरबहादुर देउवाले डा. सिंहलाई टिकट नदिने अठोट धेरै अगाडि नै गर्नुभएको थियो । देउवाका विरुद्ध काङ्ग्रेसको राजनीतिमा क्रियाशील सिंहलाई विस्थापित गर्न सभापति देउवा, महामन्त्री गगनबहादुर थापा र काङ्ग्रेसको सर्लाही जिल्ला सभापति सुरेन्द्र सिंह केही वर्षयता निरन्तर प्रयत्नशील रहँदै आएका थिए । काङ्ग्रेसको चौधौँ महाधिवेशनमा अनेक तिकडम र केन्द्रीय सत्ताको बल लगाएर अम्रेशकुमार सिंहलाई महाधवेशन प्रतिनिधि बन्नबाट रोक लगाउनुलाई शेरबहादुर गगन र सुरेन्द्रले आफ्नो ठूलो सफलता ठानेका छन् ।

२०७० र २०७४ सालको संसदीय निर्वाचनमा सर्लाहीबाट निर्वाचित सांसद अम्रेशकुमार सिंह काङ्ग्रेसभित्र डा. शेखर कोइरालाको मानिसका रूपमा चिनिनुहुन्छ । देउवाको प्रखर आलोचक मानिने डा. सिंहलाई टिकट दिलाउन नेताहरू डा. शेखर र कृष्णप्रसाद सिटौलाले देउवामाथि चर्को दबाब दिनुभएको थियो । दुवै नेताहरूको दबाब झेल्न नसक्ने अवस्था आएपछि देउवाले ‘नयाँ दिल्लीबाट नै रोक्नु भनेकोले अम्रेशलाई टिकट दिन नसकिने’ जवाफ फर्काएर कोइराला र शेखरलाई चुप लगाउन खोज्नुभएको थियो । वास्तवमा आरजु राणा र शेरबहादुर देउवा आफूविरुद्ध सार्वजनिक अभिव्यक्ति दिएकोले डा. सिंहलाई टिकट नदिने मन बनाएर बस्नुभएको थियो । तर देउवाले दिल्लीलाई अघि सारेर अम्रेशकुमारको टिकट रोक्नुभयो ।

दुई-दुई पटक विजयी सांसदलाई यसअघि यसरी उम्मेदवार बन्नबाट वञ्चित गरिएको कहिल्यै थिएन र, आफ्नै पार्टीको उम्मेदवार बन्नबाट रोक्न कुनै पार्टी अध्यक्षले नयाँ दिल्लीको नाम भजाएको पनि यसअघि कहिल्यै सुनिएको थिएन । तेह्रौँँ महाधिवेशनमा आफू सभापति बनिसकेपछि खुमबहादुर खड्कालाई उपसभापति बन्न नदिन पनि देउवाले नयाँ दिल्लीकै नाम प्रयोग गर्नुभएको थियो । महाधिवेशनमा खुमबहादुर खड्काको साथ जसलाई मिल्छ, उसैलाई सभापति पदमा विजय प्राप्त हुने निश्चित थियो । खड्का देउवाका प्रतिद्वन्द्वी रामचन्द्र पौडेलको पक्षमा जान चाहनुहुन्थ्यो । तर खड्कालाई उपसभापति चयन गर्ने विश्वास दिलाएर देउवा आफ्नो पक्षमा पार्न सफल हुनुभएको थियो । तथापि सभापति पदमा खड्काको कृपाबाट विजय प्राप्त गरेपछि देउवा आफ्नै वचनबाट पछि हट्नुभयो, उहाँले खड्कालाई उपसभापति नियुक्त गर्न चाहनुभएन । खड्काका हितैषीहरूले दबाब दिन थालेपछि त्यतिबेला पनि देउवाले ‘खुमबहादुरलाई उपसभापति नबनाउन नयाँ दिल्लीले दबाब दिएको’ भन्ने जवाफ दिनुभएको थियो । ठीक त्यसैगरी यस पटक अम्रेशलाई पार्टीको टिकट नदिन पनि देउवाले दिल्लीलाई नै अघि सार्नुभयो ।

अम्रेशकुमारको निर्वाचन क्षेत्र ‘सर्लाही ४’ बाट गगन थापा एक जनाको मात्र नाम सिफारिश गराइएको थियो र, गगन पनि सर्लाही गएर चुनाव लड्न तयार भएका थिए । अन्तिम क्षणमा आएर गगनले सर्लाहीको टिकट फिर्ता गरेपछि उक्त निर्वाचन क्षेत्रमा खास कुनै प्रभाव नभएका नागेन्द्र रायलाई गठबन्धनको उम्मेदवारका रूपमा काङ्ग्रेसले अघिसारेको छ । टिकट नपाएपछि डा. अम्रेशकुमार सिंह सर्लाही ४ मा स्वतन्त्र उम्मेदवार बन्नुभएको छ । गठबन्धनको उम्मेदवारभन्दा आफू बलियो रहेको विश्वास सिंहमा रहेको पाइएको छ । सत्तापक्षबाट कुनै गम्भीर षडयन्त्र नभएको अवस्थामा माछा चुनाव चिन्ह लिएर स्वतन्त्र उम्मेदवार बन्नुभएका सिंहको विजय निश्चित मानिएको छ ।