लेडी गागाको कुकुर डुलाउनेलाई गोली हानेर घाइते बनाउनेमध्येका एक व्यक्तिलाई २१ वर्षको जेल सजाय सुनाइएको छ । जेम्स हवार्ड ज्याक्सनलाई अदालतले उक्त सजाय सुनाएको हो । आक्रमणकारीको अभियोग लगाइएका पाँच जनामध्ये ज्याक्सन एक हुन् ।
सन् २०२१ को फेब्रुवरी २४ मा लेडी गागाका तीन वटा फ्रान्सेली बुलडगलाई डुलाउँदै गर्दा रायन फिसरलाई ज्याक्सनसहितको एउटा समूहले गोली हानेको थियो । सो क्रममा आक्रमणकारीहरुले कोजी र गुस्ताभ नामका दुई वटा कुकुर चोरेका थिए भने मिस एसिया नामको तेस्रो बुलडगचाहिँ पछि पुलिसले फेला पारेको थियो ।
आक्रमणमा गम्भीर घाइते भएका फिसर बाँच्न भने सफल भएका थिए । गागाले ५ लाख डलर इनाम घोषणा गरेपछि कुकुर फिर्ता गरिएको थियो ।
उक्त आक्रमणको घटनापछि आफ्नो फोक्सोको एक भाग हटाउनु परेको फिसरले बताएका छन् । उनी गत सोमबार भएको अदालतको सुनुवाइमा उपस्थित थिए । गोलीबारीले आफ्नो जीवन सधैंका लागि परिवर्तन गरेको उनको भनाइ छ ।
प्रतिक्रिया