अनन्तश्री राजगुरु जगतगुरु वीरेन्द्र परम्हंश ज्योतिषाचार्य

आजको पञ्चाङ्ग

श्रीशाके १९४४ शिशिर ऋतु नलनामक संवत्सर नेपाल सं. ११४३ वि.सं. २०७९ फाल्गुण ३ गते बुधबार तद्अनुसार सन् २०२३ फरवरी १५ तारिख फाल्गुन कृष्ण पक्षको दशमी तिथि ज्येष्ठा नक्षत्र हर्षण योग वणि करण आनन्दादिमा ध्वाँक्ष योग चन्द्रमा वृश्चिक राशिमा भ्रमणशील रहला । काठमाडौंमा सूर्योदय बिहान ६ः४४ मा र सूर्यास्त साँझ १७ः५४ बजे हुनेछ ।

आजको राशिफल

मेष – आजको दिन दौडधुप बढ्नेछ । जोखिम पनि बढ्ला । अरुको भरमा नबस्नु हितकर रहनेछ । बोलीको गलत अर्थ लाग्ने, विवादमा परिने र आर्थिक अभावले सताउने योग छ । शुभचिन्तकहरूले साथ दिनाले चुनौतीहरू पन्छाएर परिस्थिति अनुकूल बनाउन सकिनेछ । स्वास्थ्यमा समस्या देखापर्न सक्छ, ध्यान राख्नुहोला । शत्रुमाथि भने विजय प्राप्त होला । धैर्य राखेर व्यवहार गर्नु हितकर हुनेछ ।

वृष – शुभता बढ्ने र आरोग्यता वृद्धि हुने समय छ । नोकरीमा हुनेहरूका लागि पदोन्नतिको समय छ । केही अप्ठ्यारा परिस्थितिसँग सम्झौता गर्नुपरे पनि लगनशीलताले लक्ष्य दिलाउनेछ । आर्थिक समस्या सुल्झनुका साथै भौतिक साधनहरू जुटाउन सकिनेछ । टाढिएका आफन्तसँग पुनर्मिलन होला । सुख बढ्नेछ । रसरागमा आकर्षित हुनुहुनेछ ।

मिथुन – दिन राम्रै छ । आरोग्यता बढ्नेछ भने कार्यक्षमता वृद्धि होला । सामाजिक दायित्व वहनमा समय जानेछ । बौद्धिक पक्षमा लाभ मिल्नेछ । खराब व्यक्तित्वको विश्वासमा पर्नाले काममा धोका पाइएला, होस राख्नुहोला । सवारी तथा हातहतियारको उपयोग सावधानीसाथ गर्नुपर्नेछ । सन्तानले प्रसन्नता दिलाउनेछन् । बौद्धिक र रचनात्मक काममा सफलता मिल्नेछ । आशा उत्साह बढ्नेछ । प्रयासरत काम बन्नेछ ।

कर्कट – आजको दिन नियमित व्यवहारमा विशेष सतर्क रहनुहोला । काममा अनायासै बाधा वा हस्तक्षेप हुने सम्भावना देखिन्छ। आर्थिक अभावले पनि सताउन सक्छ । तपाईंका कमजोरीको फाइदा अरूले उठाउन सक्छन् । यसका बाबजुद प्रेमभाव बढ्नेछ । साहस पनि वृद्धि होला । रसरागमा आकर्षण बढ्नेछ । यात्रामा सफलता प्राप्त हुनेछ ।

सिंह – ब्यस्तता बढ्नेछ भने आज खर्च पनि वृद्धि होला । कामको सन्दर्भमा शक्तिशाली व्यक्तिहरूसँग प्रतिस्पर्धा बढ्नेछ । विवेक नपुग्दा हातमा आएका अवसर गुम्न सक्छन् । विभिन्न अवसर प्राप्त भए पनि स्वास्थ्य कमजोर रहन सक्छ । आरोग्यताका लागि खानपानमा विशेष ध्यान दिनुपर्ला । रसरागको भाव वृद्धि हुनेछ ।

कन्या – पराक्रम वृद्धि हुनेछ । ऋण, रोग र शत्रुमाथि विजय प्राप्त हुनेछ । मनोकूलको काम बन्नेछ । आफ्नै कमजोरीले परिवारजनमा असन्तुष्टि बढ्ने देखिन्छ, सावधान रहनुहोला । जीवनसाथीलाई केही पीडा हुने योग रहेको छ । काममा सहयोगीले साथ दिनेछन् भने विभिन्न अवसरले पछ्याउने छ । विद्यार्थी वर्गका लागि विशेष राम्रो समय छ । प्रयासरत काममा सफलता प्राप्त हुनेछ ।

तुला – आजको दिन काममा सफलता मिल्नेछ । मान सम्मान रहला । महत्वपूर्ण बस्तु गुम्ने सम्भावना पनि छ, सचेत रहनुहोला । कामका विविध झमेलाहरूबाट मुक्ति मिल्ने समय छ । काममा अरूले अधिकार जमाउने चेष्टा गर्नेछन्, तर जित तपाईंकै हुनेछ । मिठो भोजन खान पाउनुहुनेछ । व्यक्तित्वको प्रभाव बलियो बन्नेछ ।

वृश्चिक – आज स्वास्थ्यसम्बन्धी समस्याले सताउन सक्छ, सावधानी अपनाए समस्या निम्तनुबाट मुक्ति मिल्नेछ । राजनीतिक तथा सामाजिक प्रभाव कमजोर बन्न सक्छ, ख्याल राख्नुहोला । परिस्थितिलार्इ पछ्याउन नसक्दा अलिक पछि परिनेछ । खर्च बढ्नेछ, आयआर्जनमा कमी आउने सम्भावना छ । कल्याणकारी कार्यमा आकर्षण बढ्नेछ ।

धनु – दिन राम्रै छ । लगानी बढ्नेछ, रोकिएको काम बन्नेछ । मेहनत गर्दा राम्रै उपलब्धि हातलागी हुनेछ । नयाँ व्यवसाय प्रारम्भ गर्न सकिनेछ । दाम्पत्य सम्बन्ध सुमधुर बन्नेछ। अरूको भरपर्दा काम बिग्रन सक्छ, ध्यान राख्नुहोला । मित्रजनको सहयोग र समर्थन प्राप्त हुनेछ ।

मकर – आयबल बढ्नेछ । आश मारेको काम बन्नाले उत्साह वृद्धि होला । दाम्पत्य सम्बन्ध प्रगाढ हुनेछ, सन्तानबाट प्रसन्नता मिल्नेछ । धार्मिक तथा सामाजिक क्रियाकलापमा रुचि बढ्नेछ। परिवारजनको सहयोगले विशेष कामहरू बन्नेछन्। आरोग्यता बढ्नेछ । मिठो भोजन प्राप्त हुनेछ । आयस्रोत बढ्ला ।

कुम्भ – कर्मबल वृद्धि हुनेछ । रोकिएका काम बिस्तारै शुरु हुनेछन् । कृषिकर्म तथा पशु व्यवसायबाट फाइदा हुने देखिन्छ । स्थायी सम्पत्ति आर्जन गर्ने समय छ, बाहिरी यात्रामा कष्ट हुने देखिन्छ । प्रयासरत काम बन्नेछ । देखापरेको समस्याको समाधान मिल्नेछ । बोली र व्यक्तित्वको प्रभाव बढ्ला ।

मीन – भाग्यबल बढ्ने योग भए पनि आज सरोकार नभएका विषयमा रुचि राख्नाले दुःख पाइनेछ । विपरीत लिंगीहरूप्रति आकर्षण बढ्नुका साथै प्रेम र मित्रताको बन्धन कसिने समय छ ।अरूको उक्साहटमा लाग्नाले बेफाइदा हुन सक्छ, ध्यान राख्नुहोला । अविवेकी निर्णयले अप्ठ्यारोमा पार्नेछ । आरोग्यता वृद्धि हुनेछ । समस्याको समाधान प्राप्त हुनेछ ।