• डम्बर निदाल, डडेल्धुरा

शिवशिखर सहकारी संस्थाविरुद्ध स्थानीय युवा आन्दोलित भएका छन् । सहकारीमाथि कानुनी कारवाही हुनुपर्ने माग राख्दै स्वतन्त्र युवा एकता समाज डडेल्धुराका युवाहरुले ज्ञापन पत्र बुझाएका छन् ।

डडेल्धुरामा मात्रै ४२ करोड रकम निक्षेप संकलन गरी बन्द भएको शिवशिखर बहुउद्देश्यीय सहकारीले स्थानीयको रकम फिर्ता गर्नुपर्ने र सहकारीमाथि कानूनी कारबाही हुनुपर्ने माग राख्दै आइतबार जिल्ला प्रशासन कार्यालयमार्फत प्रधानमन्त्रीलाई ज्ञापन पत्र बुझाएको स्वतन्त्र युवा एकता समाज डडेल्धुराले जनाएको छ ।

यसैगरी नेपाली नागरिकलाई भुटानी शरणार्थी बनाएर अर्बौं रकम भ्रष्टाचार गर्ने दोषीलाई कारबाहीको माग राख्दै स्वतन्त्र युवा एकता समाज डडेल्धुराका संयोजक सुरत तमोलीको नेतृत्वमा जिल्ला प्रशासन कार्यालयमार्फत प्रधानमन्त्रीलाई ज्ञापनपत्र बुझाएको स्वतन्त्र युवा एकता समाज डडेल्धुराका संयोजक सुरत तमोलीले जानकारी दिए ।

डडेल्धुरा जिल्लामा रहेको स्वतन्त्र युवा एकता समाज डडेल्धुराले विगत तीन वर्षदेखि डडेल्धुरा जिल्लासहित सुदुरपश्चिमका विभिन्न जिल्लामा सामाजिक कार्यहरु नियमित रुपमा गर्दै आइरहेको छ भने युवाहरुलाई एकताबद्ध बनाइ समाजमा भइरहेका बेतिथि, विसंगति र रुढीवादी अन्धविश्वासका विरुद्ध आवाज उठाउँदै आइरहेको एक निःस्वार्थ रूपमा रहेको स्वतन्त्र युवा एकता समाजको रूपमा परिचित संस्था भएको ज्ञापन पत्रमा भनिएको छ ।

डडेल्धुरा जिल्लाबाट करोडौँ रकम निक्षेप संकलन गरिरहेका डडेल्धुराका वचतकर्ताहरुको रकम गैरकानुनीरुपमा लगानी गरिरहेको शिवशिखर सहकारी संस्था लि.विरुद्ध बाइक ऱ्यालीसहित निक्षेपकर्तालाई जिल्ला प्रशासन कार्यालयमा उपस्थित गराइ छलफल समेत गरीसकेको र पटक-पटक सहकारीका बारेमा कानुनी उपचार गर्छु भन्ने सरोकारवाला निकायले पछिल्ला दिनमा दिलासुस्ती गरेको देखिँदा पुनः सरोकारवाला निकायको ध्यानाकर्षण गराउन ज्ञापन पत्र बुझाइएको जनाइएको छ ।

यदि यथाशीघ्र माग सम्बोधन नगरेमा जुनसुकै बेला पनि आन्दोलनका विभिन्न संघर्ष गर्न बाध्य हुने ज्ञापनपत्रमा भनिएको छ ।