गैरआवासीय नेपाली संघ बेल्जियमले बेल्जियमस्थित नेपालीजनका साथै नेपालमा आइपर्ने कुनै पनि आपतकालिन समस्याको अवस्थामा सहयोग गर्न एक ‘आपतकालिन अक्षयकोष’ स्थापना गर्ने निर्णय गरेको छ । एनआरएनए बेल्जियमको नवनिर्वाचित कार्यसमितिको सोमबार (२४ जुलाई २०२३) बसेको प्रथम बैठकले आपतकालिन अक्षयकोष स्थापनाको प्रस्ताव पारित गरेको हो ।

संघकी नवनिर्वाचित अध्यक्ष सीता सापकोटाको अध्यक्षतामा बसेको बैठकले बेल्जियमस्थित नेपाली समुदायलाई एकढिक्का बनाइ भाइचारा र बन्धुत्वको विकास गराएर समाजलाई एकतावद्ध तुल्याउन पहल गर्ने संकल्प प्रस्ताव पनि पारित गरेको छ ।

महासचिव रुविना शर्माका अनुसार पहिलो बैठकले खड्कबहादुर केसीको अध्यक्षतामा रहेको निवर्तमान कार्यसमितिले ९औँ महाधिवेशन सफलतापूर्ण सम्पन्न गराउनुका साथै बरबुझारथसहित औपचारिक रुपमा नेतृत्व हस्तान्तरण गरेकोमा धन्यवाद ज्ञापन गरेको छ ।