^{_{file photo}}

अर्को बैठक असोज २ गते बस्ने गरी कांग्रेस केन्द्रीय समिति बैठक सम्पन्न

नेपाली कांग्रेस केन्द्रीय कार्यसमितिको यही साउन २ गतेदेखि सञ्चालन भएको बैठक बुधबार (१० साउन) सम्पन्न भएको छ । बैठक समापन गर्दै पार्टी सभापति तथा पूर्वप्रधानमन्त्री शेरबहादुर देउवाले बैठकमा आफ्नो बारेमा सोचेभन्दा कम आलोचना भएको बताएका छन् ।

बैठक समापनमा मन्तव्य दिँदै सभापति देउवाले भने, ‘धेरै आलोचना होला भन्ने लागेका थियो, तर कम आलोचना भयो, यसका लागि धन्यवाद ।’ उनले केन्द्रीय समितिको बैठकबारे लाइभ गरेका कारण पार्टीभित्रका नेताहरूको क्षमता सबैले बुझ्ने अवसर पाएको टिप्पणी गरे ।

सभापति देउवाले पार्टीको केन्द्रीय समितिको अर्को बैठक असोज २ गते बस्ने पनि जानकारी दिए । बैठकको अन्तिममा पार्टीलाई विभिन्न समयमा योगदान गरेका नेता तथा कार्यकर्ताका आफन्तको मृत्युमा शोक प्रस्ताव पारित गरिएको थियो ।