प्रतिकारपछि हतियार बरामद

बाँके राष्ट्रिय निकुञ्जबाट खटिएको नेपाली सेना तथा निकुञ्ज कार्यालयका कर्मचारीसहितको संयुक्त पट्रोललार्ई बाँकेको राप्ती सोनारी गाउँपालिका–१ मा २ राउण्ड फायरिङ भएको छ ।

स्थानीय राजकोट इलाकामा अवैध रूपमा निकुञ्ज क्षेत्रमा प्रवेश गरेर वन्यजन्तु चोरी सिकारी कार्यमा संलग्न व्यक्तिहरूले २ राउन्ड गोली फायर गरेपछि प्रतिकारमा पट्रोल टोलीले ४ राउन्ड जवाफी फायर गरेको थियो ।

जवाफी फायरिङपश्चात् खोज तलासको क्रममा उक्त इलाकाबाट १२ बोर हतियार १ नाल, भरुवा बन्दुक १ नाल, उक्त हतियारमा प्रयोग हुने गोली तथा बन्दोबस्तीका सामानहरू फेला परेको सैनिक मुख्यालयले जनाएको छ । चोरी सिकारीमा संलग्न भने भाग्न सफल भएका छन् ।