✍ अनन्तश्री राजगुरु जगतगुरु वीरेन्द्र परम्हंश ज्योतिषाचार्य

आजको पञ्चाङ्ग

श्रीशाके १९४६ नेपाल सं. ११४४ कालयुक्तनाम संवत्सर ग्रीष्म ऋतु वि.सं. २०८१ ज्येष्ठ ३ गते तद्अनुसार सन् २०२४ मे १६ तारिख बिहीबार वैशाख शुक्ल अष्टमी तिथि ७ः२२ पर नवमी तिथि मघा नक्षत्र ध्रुव योग बालव करण आनन्दादिमा मुशल योग चन्द्रमा सिंह राशिमा भ्रमणशील रहनेछ । काठमाडौंमा सूर्योदय बिहान ५ः१६ मा भयो र सूर्यास्त साँझ १८ः४५ मा हुनेछ । अष्टमी व्रत, गोरखकाली पूजा, श्रीपशुपतिनाथमा दमनार्पण, सीताजयन्ती ।

आजको राशिफल

मेष – दीर्घकालीन रूपमा फाइदा हुने काममा हात हाल्ने समय छ । तार्किक क्षमता पनि बढ्ला । विशेष सभा-समारोहमा भाग लिने अवसर प्राप्त हुने देखिन्छ । तथापि, प्रयत्न गर्दा मौकाको फाइदा उठाउन नसकिने योग छ । आजको दिन सवारीसाधनको प्रयोगमा विशेष सावधानी अपनाउनु हितकर होला । आमोदप्रमोदको भाव पैदा हुनेछ ।

वृष – व्यवसायमा लाग्नेहरूलाई विशेष फाइदा मिल्ने दिन छ । अन्यका हकमा पनि समय राम्रै छ । रुचिका विषयमा लगानी बढाउन सकिएला । आर्थिक लाभ हुने कार्यमा उत्साहजनक फाइदा हुनेछ । इर्ष्या गर्नेहरूले काममा अवरोध गर्नसक्ने सम्भावनाप्रति सचेत रहनु उचित हुनेछ । पारिवारिक समस्याको समाधान मिल्नेछ ।

मिथुन – सानातिना काममा अल्झनुपर्दा मुख्य काममा अवरोध पुग्नसक्ने समय भएपनि परिवारजनको साथले काममा उत्साह जगाउने छ । प्रेम र मित्रताको बन्धन कसिने दिन छ । दाम्पत्यजीवन सुखमय बन्ला । परोपकारमा मन जानेछ । स्वास्थ्य भने केही कमजोर भएको अनुभुति होला । आँट बढ्नेछ, शत्रुमाथि विजय प्राप्त हुनेछ ।

कर्कट – आजको दिन सानातिना काममा महत्वपूर्ण समय बित्न सक्छ । अस्वस्थताका बाबजुद कामको दायित्व बढ्ने समय छ । काममा भएको ढिलासुस्तीले चिन्ता बढाउन सक्छ, धैर्य राख्नुहोला । अप्रिय समाचारले दुःखी बनाउन सक्ने योग छ । यात्रागत कार्य सफल हुनेछ । सुख वृद्धि होला । रोकिएको काम बन्नेछ । रसरागमा आकर्षण बढ्नेछ ।

सिंह – आजको दिन मिश्रित फलदायी रहला । राम्रै आम्दानी हुने रोजगारीको प्रस्ताव आउन सक्छ, तर नयाँ काममा हात हाल्न केही समय पर्खनु हितकर होला । बेसुरमा अरूलाई दिएको वचनले अप्ठ्यारोमा पार्न सक्छ । पढाइलेखाइमा प्रगति गर्न नसकिने र व्यापारमा पनि सोचेको फाइदा नउठ्ने योग छ । रसरागका कार्यमा आकर्षण बढ्ला ।

कन्या – समय शुभदायी छ । व्यापारमा राम्रै फाइदा हुने र आँटेका काम समयमै सम्पादन हुने देखिन्छ । पछिसम्म लाभ हुने काममा लगानी गर्ने अवसर प्राप्त होला । मित्रजनबाट विभिन्न सहयोग र उपहार पाइनेछ । भौतिक साधन जुट्नाले आयआर्जन पनि राम्रै हुने योग छ । कतै अतिथिका रूपमा सम्मान पाइएला । कार्यगति बढ्नेछ ।

तुला – दिन अलिक असहजरूपले बित्ने देखिन्छ । आज अनावश्यक भ्रमण हुन सक्छ भने स्वास्थ्यगत समस्याले पनि सताउने देखिन्छ । तर सहयोगीहरूले काममा उत्साह जगाउनेछन् । रोकिएका काम बन्ने र नयाँ काम सुरु गर्न सकिनेछ । यशवर्चश्व बढ्नेछ ।

वृश्चिक – कर्मबल बढ्नेछ । प्रतिस्पर्धीलाई पनि पछि पार्न सकिनेछ, तर सहयोगको आशा देखाउनेहरूले धोका दिन सक्छन्, सचेत रहनुहोस् । उद्योग र व्यापारमा फाइदा हुनेछ, सँगसँगै केही खर्च पनि बढ्ला । मिठो भोजन प्राप्त गर्नुहुनेछ । आजको दिन योजना र बजेट बनाइ कार्य गर्न विशेष प्रयत्न गर्नु उचित हुनेछ ।

धनु – सानातिना काम र घरेलु समस्या देखापरेपनि रोकिएका काम बन्नाले उत्साह जाग्ने समय छ । पुरुषार्थद्वारा अधिकार स्थापित गर्न सकिनेछ । प्रतिस्पर्धामा पनि विजयी भइएला । विद्यामा कमजोरी र लेनदेनमा विवाद होला । विगतका समस्या बल्झिन सक्छन्, सचेत रहनु हितकर हुनेछ । रसरागात्मक काममा आकर्षण बढ्नेछ ।

मकर – कला, साहित्य, मनोरञ्जन आदि क्षेत्रमा रुचि बढ्ने समय छ । कामको सन्दर्भमा विशिष्ट व्यक्तित्वहरूसँग मित्रता बढ्नेछ । चिताएको काम समयमै सम्पादन नहुन सक्छ, ध्यान राख्नुहोला । स्वास्थ्य केही कमजोर भएको अनुभूति हुन सक्छ । आज मेहनतअनुसार फाइदा कमै होला । जोखिम बढ्नेछ ।

कुम्भ – मनमा कुनै कुरामा डरको भाव पैदा भएपनि विभिन्न अवसरले पछ्याउनेछन् । बोलीको प्रभाव पनि बढ्नेछ । ठीक समयमा सही निर्णय लिन सकिनेछ । सुखदुःखमा साथ दिनेहरू प्रशस्तै भेटिनेछन् । रमाइलो यात्रा गर्ने अवसर जुट्नेछ भने कामको चापबाट फुर्सद पाइएला । दाम्पत्यसुख बढ्नेछ । भ्रमणमा हुनेछ । मिठो भोजन प्राप्त हुनेछ । आर्थिक विकाससित सम्बन्धित कार्यमा सफलता मिल्नेछ ।

मीन – अरूको फाइदाका लागि उपयोग भइने दिन छ । परिस्थिति आफ्ना लागि अलिक प्रतिकूल बन्ने योग छ । अरूका काममा समय बित्न सक्छ । उपलब्धि प्राप्त गर्न निकै मिहिनेत गर्नुपर्ला । काम पूरा नहुनाले मन खिन्न रहनेछ । आफन्त तथा नजिकका साथीभाइ टाढिन सक्छन् । प्रतिकुलताका बाबजुद साहस कायम रहनेछ । समस्याको समाधान मिल्नेछ ।