सशस्त्र प्रहरीले कोरलानाका (मुस्ताङ)बाट भित्रिएका विद्युतीय सवारी साधन नियन्त्रणमा लिएपछि त्यसबारे छानबिनका लागि गठित समिति मुस्ताङ पुगेको छ ।

विद्युतीय सवारी साधन नियन्त्रणमा लिएपछि अर्थमन्त्रालयले भन्सार विभाग, नीति तथा सञ्चालन महाशाखाअन्तर्गतको मूल्यांकन शाखाका प्रमुखसमेत रहेका निर्देशक भुपालराज शाक्यको नेतृत्वमा छानबिन समिति गठन गरेको थियो ।

कोरलानाकाबाट पैठारी गरिएका विद्युतीय सवारीको अनुसन्धानका लागि शाक्य नेतृत्वको तीन सदस्यीय टोली बेनी-जोमसोम सडकमार्ग हुँदै शुक्रबारमुस्ताङको जोमसोम पुगेको मुस्ताङ भन्सार कार्यालयका प्रमुख बिदुर चुडालले जानकारी दिएका छन् ।

छानविन टोली मुस्ताङ पुग्नुअघि पर्वत र कास्कीमा सशस्त्र प्रहरीले नियन्त्रणमा लिएका विद्युतीय सवारी साधनको अनुमगनसमेत गरेको भन्सारप्रमुख चुडालले जानकारी दिए । चीनबाट पैठारी गरी नेपाल भित्रिएका विद्युतीय सवारी साधन आयातमा कैफियत रहे वा नरहेको भन्ने विषयमा टोलीले अनुसन्धान सुरु गरेको हो ।

टोलीले पोखरा हेम्जामा ९८ र पर्वतको कुश्मा १७ वटा विद्युतीय सवारीको अनुगमन गरेको छ । कोरलानाकाबाट भन्सार जाँचपास भइ लोमान्थाङ हुँदै जोमसोम झारिएका २६६ वटा विद्युतीय सवारी साधनको समेत शुक्रबार नै टोलीले स्थलगत अनुगमन गरेको भन्सार प्रमुख चुडालले जानकारी दिए । मुस्ताङको घरपझोङ-४ जोमसोमस्थित बसपार्क क्षेत्रमा पार्किङ गरी राखिएका उक्त सवारी साधनको अनुगमन गरिएको छ ।

छानविन टोलीले आज (२३ जेठ) कोरलानाकामा राखिएका ३९४ वटा विद्युतीय सवारीको अनुगमन गर्दैछ ।

ज्ञातव्य छ, गत भदौ ३१ गतेदेखि सञ्चालनमा आएको कोरलानाकाबाट गत जेठको दोस्रो साता चिनियाँ कम्पनी बिवाईडीले ७७५ वटा विद्युतीय सवारी साधन नेपाल भित्र्याएको थियो ।